.JPG)
Монголд нэг л зүйл маш тогтвортой. Тэр нь улс төрийн тогтворгүй байдал гэдэг хошигнол иргэдийн дунд тархсан. Монгол улсын засгийн газрын дундаж наслалт 1,7 жилийн настай нь ингэж дүгнэхэд хүргэсэн. МАН УИХ-д 65 -уулаа болсон үед бүрдүүлсэн Ж.Эрдэнэбатын тэргүүлсэн Засгийн газар ч 1 жил 2 сар ажиллаад тахимаа өглөө. Ард иргэд, сонгогчдын Засгийн газраа тогтвортой байлгах хүсэл эрмэлзлэлийг МАН ийнхүү уландаа гишгэв.
Хүрэлсүх "сүхдэж" гарч ирлээ. Тэр УИХ-дахь 33-ын бүлгийг удирдаж, Засгаа ч огцруулж, Намын бага хурал дээр ч үнэмлэхүй ялалт байгуулсны үр дүнд хүссэн албан тушаалдаа хүрлээ. -Ажилтай, орлоготой иргэн, нийгмийн баялгийн тэгш шударга хуваарилалт, төрийн албан хаагчдын хариуцлага, өндөр ёс суртахуун, авилгатай болон авилгачтай эвлэрэхгүй тэмцэнэ, хүнсний экспортлогч орон болно, үндэсний аюулгүй байдлаа бэхжүүлнэ гэж тэр хэлсэн үгэндээ онцолсон. Ийм л зүйлийг иргэд олон жил хүлээж буй тул нийгэм талархан угтсан. Талархлаа гээд ой санамжаа мартаж болохгүй. Монголын үе үеийн удирдагчид иймэрхүү үгийг олж хэлэхдээ гаршсан. Харин хийсэн нь үгүй. Итгэж байсан С.Баяр ч, дэмжиж байсан Ц.Элбэгдорж ч ард иргэдээ "илбэдэж" дөнгөсөн. Тэгэхээр хэлэх амархан, хийх амаргүйг ерөнхий сайдад гараан дээр нь сануулах нь зөв. Хэлсэн ярьснаа бүрэн дүүрэн хэргжүүлэхийн тулд түүнд ядаж хугацаа хэрэгтэй. Гэтэл түүний тэргүүлэх Засгийн газар 2020 оны 6-р сар хүртэл наслах уу гэдэг өөрөө асуудал. УИХ-д үнэмлэхүй олонхи болсон намаа тэнцүү хоёр хэсэгт 32:33 харьцаагаар "сүхдэж " орхисон Засгийн тэргүүнд ямар ирээдүй харагдана вэ? Өөрийн намынхантайгаа хэл амаа ололцохыг эрмэлзэлгүй, өрөөл бусдын намд найр тавьсан үйлдэл нь намын дотоод зөрчлийг дэвэргэж эхэлснийг ажиглаж болох нь. Тэр одоо 14 хоногийн дотор кабинетаа бүрдүүлэх ёстой. Ажиглаж буйгаар тэр 15 сайдынхаа 9-ийг нь 33- ын фракцийн, 2-ыг нь ерөнхийлөгчийн, 4-ыг нь АН-ын бүлгээс санал болгох хүмүүсээр бүрдүүлэх эхний хувилбар, таамаглал яригдаж байна. Энэ үнэн бол маш осолтой хувилбар. Кабинетийг бүрдүүлэх цаг мөчөөс эхлэн Хүрэлсүх эхнийхээ цохилтыг журмын нөхдөөсөө амсах цаг ирнэ. Томилгоо зөрчлийг улам хурцатгана. Энэ зөрчил 11-р сард болох МАН-ын Их Хурлын үеэр дээд цэгтээ хүрэх магадлалтай. УИХ, бага хурал дээр ялалт байгуулж чадсан 33-ын бүлэг МАН-ын Их Хурал дээрээ ээлжит ялалтаа байгуулж чадах эсэх нь У.Хүрэлсүхийн ч, түүний тэргүүлсэн Засгийн газрын хувь заяаг эцэслэн шийдэх болно гэж улс төр судлаачид ажиглалт, дүгнэлтээ хийхэд хүрчээ.
Ц.ЭНХБАТ
