Засгаа МАН өөрөө татаж унагасан. Түүнд АН-ын 9 гишүүний 8 нь дэм өгсөн. АН-ын гишүүд Ж.Эрдэнэбатынхыг огцруулахад, У.Хүрэлсүхийг ерөнхий сайдаар томилоход нь оролцсоноос биш, хамтарч Засгийн эрхийг барихгүй гэдгээ ерөнхий сайд У.Хүрэлсүхэд дуулгажээ. Хүрэлсүхийн тэргүүлэх Засгийн газар хэр удахыг хэн ч хэлж мэдэхгүй болжээ. Ямар ч гэсэн 1996-2000 оны хооронд АН УИХ-д олонхи болж, 50-лаа байх үедээ Засгаа 3 -ч удаа огцруулж амжсан үйлдэл давтагдах бий гэж улс төрийн хүрээнийхэн болгоомжилж байна. Ж.Эрдэнэбатын тэргүүлсэн Засгийн Газар 1 жил 2 сар ажилласан. Тэгвэл У.Хүрэлсүхийн тэргүүлэх кабинет хэр тэсэхийг мэдэх боломжгүй. Намын хагарал нь гүнзгийрч, үзэн ядалт болж хувирбал удаан тэсэхэд бас л бэрх. Хэрэв зээ "жийгдсэн" 32 гишүүн босож, АН-ын 9-тэй эвсэж чадвал, дахиад л Засгаа унагах боломж бүрдэнэ. АН-ын гишүүдийн хувьд сөрөг хүчний үүргээ гүйцэтгэж, МАН-аар дахин дахин тоглохыг үгүйсгэх аргагүй болжээ.
Ц.ХИШИГЖАРГАЛ