Ингэж асуух нь ихэсжээ. Яагаад гэвэл, 32:33 бүлгийн зөрчил албан тушаал бүр дээр хурцдах болсон байна. Л.Энх-Амгаланг УИХ-ын дэд даргаар томилсноор М.Энхболдын тал УИХ -д бүрэн эзэгнэлээ тогтоосон гэж хэлж болно. Тиймээс УИХ дахь МАН-ын намын бүлгийг 33-ын бүлэг авах ёстой хэмээн нөгөө талаас шуурах болов. Энэ шуурганд УИХ дахь МАН-ын бүлгийн дарга Хаянхярваа өртөхөд ойрхон болжээ. 2016 оны УИХ-ын сонгуулийн ялалтанд Хаянхярваагийн намдаа оруулсан хувь нэмэр үлэмж байсан гэж нам нь ч, дэмжигчид ч үнэлдэг. Тиймээс ч Хаянхярвааг Намын бүлгийн даргаар санал нэгтэй томилсон.
М.Энхболдыг ерөнхийлөгч болмогц, түүнийг УИХ-ын даргаар залж өргөмжлөх нууцхан төлөвлөгөө ч байсныг намын удирдах бүрэлдэхүүн үгүйсгэдэггүй. Гэтэл үүссэн нөхцөл байдал бүх төлөвлөгөөг эвдэв. УИХ-аа алдсан 32-ын бүлэг УИХ дахь Намын бүлгээ авч байж тэнцвэржүүлнэ гэж үзэх болсон байна. Тиймээс Хаянхярвааг онилж, түүнийг намын бүлгийн даргаас чөлөөлөх хөдөлгөөнийг өрнүүлж эхлэхээр зэхсэн тухай мэдээлэл гарч эхэллээ. УИХ дахь МАН-ын хоёр том бүлгийн мөргөлдөөн дахин ширүүсэж эхэллээ. Энэ байдлаараа үргэлжилбэл, У.Хүрэлсүхийн тэргүүлэх Засгийн Газарт тогтвортой удаан ажиллахад бэрх болно гэж судлаачид дүгнэж байна. У.Хүрэлсүх намын дарга боллоо ч, засаг тогтвортой ажиллана гэх баталгааг хангахгүй. Учир нь албан тушаал бүр хэрүүлийн алим болжээ.
Ц.ЭНХБАТ
