Тэр хаан болно. Одоогоор тэр ерөнхий сайд болсон. Хэрвээ эрх баригч МАН-ын дарга болчихвол тэр тамгаа ч атгаж, титмээ ч өмсөх болно. М.Энхболд хувь заяатайгаа эвлэрч, намын даргаа өгөхөө илэрхийлсэн. Харин хэнд вэ? гэдгээ 14 хоногийн дараа мэдэх болно. Яг одоогоор У.Хүрэлсүхээс өөр хүн харагдахгүй байна гэж намын хүрээллийнхэн шуугиж байна. Өнгөрөгч амралтын өдрүүдэд 21 аймаг, Дархан, Эрдэнэт хотын намын хороод хуралдаж, Их Хурлын төлөөлөгчдөө сонгосон. Ирж буй мэдээллээр 33:32-ын харьцаа тийм ч хол зөрөөгүй гэж аль аль тал нь үзэж буйг эх сурвалж хэлж байна. 32-ын зүгээс хэн дэвших нь тодорхой бус. Хэдэн сарын өмнө яригдаж, нэрлэгдэж байсан Ж.Эрдэнэбатын нэр л лав дуулдахаа больсон байна. Тэмцээд буй Ж.Мөнхбат уу, эсвэл өөр хэн нэгэн байна уу? Гэдэг асуулттай 32-ын бүлэг өөрөө тулгарчээ. Энэ бол 32-ын бүлгийн сул тал буюу, ялагдах гол магадлал.
Харин 33-ын бүлэг, тэдний багийн толгойлогч У.Хүрэлсүхийн хувьд давуу тал нэгэнт үүссэн байна. Тэр Засгийг гартаа оруулсан. Нэр дэвшинэ гэдгээ эрт зарласан. Намын даргын марафондоо аль эртнээс орсон учир цаг хугацаа ч хожсон. Эхний ялалтаа байгуулж, ерөнхий сайдаар томилогдсон. Тэр МАН-ын Их Хурлаар ээлжит ялалтаа байгуулж, намын даргаар сонгогдож чадвал Монголын хэмжээлшгүй эрхэт хаанаар өргөмжлөгдөнө. Намын тамгаа гартаа атгасан тохиолдолд УИХ-ын үлдсэн 32-ыг мэдэлдээ оруулж дөнгөнө. Тэр тохиолдолд тэр УИХ-аа ч, Засгаа ч нударга дор зангидах юм. Ийм нэгэн хэмжээлшгүй эрхтэй хаан өргөмжлөгдөхөд 14 хоног үлджээ. Ийнхүү тэрбээр эхлээд намаа , дараа нь ерөнхий сайдаа авдаг жишгийг эвдсэн стандарт бус улс төрчөөр нэрлэгдэхэд ойртжээ.
Ц.ЭНХБАТ