Хүрэлсүх намын даргад өрсөлдөхөө зарласан. Тэр бол одоогоор хамгийн хүчтэй өрсөлдөгч. Пиарын Дэмбэрэл фэйсээр нэр дэвшинэ гэдгээ илэрхийлсэн. Зарим хүмүүсийн нэр яригдаж буй. Гэхдээ хол явах нь юу л бол. Ү.Хүрэлсүхийн гол өрсөлдөгч нь 32-ын бүлгээс тодорно. Ерөнхийлөгчийн сонгуульд ялагдсанаас хойш М.Энхболдын буюу 32-ын бүлэг намын даргад нэр дэвшүүлэх хүнээ өдий хүртэл тогтож чадаагүй явна. Ерөнхий сайд асан Ж.Эрдэнэбатын нэр цэвэр ч, намынхан дундаа рейтинг нь өндөр биш гэж үзэж байна. Мөнхбат хурцадсан, дээр нь нэрээ сэвтээсэн. Бямбацогт ухарсан, намын бүлгийн дарга Хаянхярваагийн нэр хүнд мөн л хангалтгүй. Энэ бүхэн нь 32-ын бүлгийн өмнө тулгарсан асуудал юм. Хоёр зам тэдэнд үлдсэн. Нэг нь гараа өргөн бууж өгч, 33-ын багтаа дагаар орох. Нөгөө нь, Хүрэлсүхтэй өрсөлдөх хэмжээний нэр дэвшигчийг олж, яаралтай тордох, эцсээ хүртэл тэмцэх.
Яг өнөөгийн нөхцөлд М.Энхболдыг дахин зүтгүүлэх хувилбар яригдаж эхэлсэн байна. Чуулганы танхимд Мөнхбаттай хэрэлдэж, нэрээ хугалсан гэж У.Хүрэлсүхийг үзэх, түүнд дургүйцэх хэсэг ч хүрээгээ тэлжээ. У.Хүрэлсүх намын дарга болбол нам алсдаа хуваагдана гэж санаа сэтгэл нь зовох нөгөө хэсэг ч бий болсон байна. Тиймээс энэ намыг хагалж, бутаргалгүй, фракц хоорондын учрыг нь олж зангидах цорын ганц хүн нь Та гэж М.Энхболдыг сэнхрүүлэх ажиллагаа эхэлсэн байна. Харин УИХ-ын дарга М.Энхболд исгэрэх салхи, шаагих бороо, лавсан орох цасыг үл тоох хад чулуу мэт хөдөлгөөнгүй оршино.
Ц.ЭНХБАТ