МАХН хоёр даргатай болж, нам нь хоёр хуваагджээ. Хэн нь хууль ёсны дарга вэ? гэдэг маргаан дэгдээд багагүй хугацаа өнгөрлөө.
Н.Энхбаярыг дагасан Ганбаатар, Баянсэлэнгэ, Удвал, Тулга, Шаравдорж нар хуучин бууриа сахин үлдсэн бол О.Баасанхүү, түүнийг дэмжигч Бямбасүрэн нар МАХН-нхаа Их хурлыг зарлан хуралдуулж, намын даргаараа О.Баасанхүүг зарлаад төдий чинээ хугацаа өнгөрч байна.
Аль аль тал нь "Бид хууль ёсных. Манай дарга бол МАХН-ын хууль ёсны дарга" хэмээн зүтгэж буй. Аль аль тал нь шүүхэд хандсан тул Дээд Шүүх 19-ны өдөр эцэслэнэ гэсэн хариуг өгсөн.
Н.Энхбаярын талыг баримтлагчид -"Энэ хурал бол захиалагчтай, мөн санхүүжүүлэгчтэй. Улс төрийн зорилготой. Намыг булаах санаархалтай. Хуралд оролцогчдод мөнгө тараасан. Хурал хүчин төгөлдөр биш. Манай гишүүд оролцоогүй" гэж удаа дараа мэдэгдсэн.
Тэгвэл О.Баасанхүүг дэмжигчид- "Биднийг ор үндэсгүй гүтгэн доромжилж байна. Бид Нарантуулын худалдаачид биш. Биднийг Нарантуулаас автобусаар зөөж авчраагүй. Энэ бол гүтгэлэг. Н.Энхбаяр бол сонгууль болохоор л намаа гэдэг. Бусад үед нь цаас шиг хаядаг" гэж байр сууриа илэрхийлэх болов. Гэхдээ О.Баасанхүүгийн талыг баримтлагчид Их хурлаа ч, Хэвлэлийн бага хурлаа ч Төрийн Ордонд удаа дараа хийж буй нь эрхгүй анхаарал татаж байна. Төрөөс, эрх баригчдаас дэмжлэг байна гэж уншиж болох. Үгүй ядахдаа үйл явдалд нь саад болохгүй байна гэдэг бас л дэмжиж буй нэг хэлбэр гэж хэлж болох.
Ийнхүү МАХН, түүний дарга Н.Энхбаярын улс төрийн тоглолтыг хязгаарлах ээлжит улс төрийн өрөг өрөгдөж эхэллээ. Түүнээс нь намыг нь хуулиар булаан авбал түүний дараачийн нүүдэл юу байх бол? гэдэг сонирхол татсан асуулт шинээр тавигдахад тун ойрхон байна. Дээд шүүхийн хурал энэ сарын 19-нд болно.
Ц.ЭНХБАТ