.jpg)
Засгийн газраар батлуулж, Монголын морин спорт уяачдын холбооноос зохион байгуулдаг “Дүнжингарав-2018” төвийн бүсийн хаврын хурдан морины уралдаан өчигдөр Говьсүмбэр аймгийн Баянталд болжээ. Жил бүр оЛны шүүмжлэл, төрийн бус байгууллагуудын эсэргүүцлийг үл хайрхан байж зохион байгуулагддаг энэ уралдаан өнөө жил бүр ч том асуудал дагууллаа.
Учир нь “Дүнжингарав-2018” уралдаан шөнө дөл хүртэл үргэлжилж баахан бужигнаан болжээ.
“Хавар морь уралдуулахыг зогсоовол монгол ёс заншил, уламжлалаа алдана” хэмээн мэдэмхийрэгчид жинхэнэ утгаар нь өөрсдөө ёс заншлаа уландаа гишгэж “шөнийн уралдаан” гэгчийг зохиосон байх юм. Монголын түүхэнд урьд, хожид хэзээ ч болж байгаагүй “шөнийн уралдаан”-д баяд, ноёд, алдар цуутнууд цуглан цэнгэж, 16 хүүхэд мориноос унаж 3 хүүхэд хүнд бэртэж, гэмтсэн гэсэн тоо гарчээ. Гэхдээ энэ бол албан бус тоо. Шөнө дөлөөр дахиад хэдэн ч хүүхэд унаж бэртсэнийг мэдэх хүн одоогоор алга.
.jpg)
Энэ наадмын хоёр дахь асуудал нь “эрлийз морь уралдсан” гэх маргаан.
Уг нь одоогийн ерөнхий сайд У.Хүрэлсүх Шадар сайдын албыг хашиж байхдаа буюу жилийн өмнөхөн “Монгол газар дээр монгол морь л уралдана” гэсэн поп үг хэлж олны талархлыг ихэд хүртсэн байдаг. Гэвч энэ жилийн “Дүнжингарав-2018”-ийн үеэр энэ үг лөөлөө болж эрлийз, хурлийз, хольцтой, хольцгүй нийлэн уралдаж эх, адгаа алджээ.
Харин энэхүү эмх замбараагүй, олны уур бухимдал төрүүлсэн энэ наадам гэгч зугаацлын арга хэмжээг энэ хэвээр нь орхих уу, эсвэл хэн нэгэнд хариуцлага тооцох уу гэдэг нь маш бүрхэг үлдэж байна.
.jpg)
Наадам хэмээн нэрлэсэн хөрөнгөтнүүдийн зугаацлын үеэр, УИХ-ын гишүүд, уул уурхайн дарга захирлууд, өөрсдийгөө алдарт уяач хэмээн тунхаглагчид, түүний гэр бүл, хамаатан саднууд цуглажээ. Тэдний хэрхэн зугаацаж явсныг бид цуварлаар нийтлэх болно.
С.ШҮРЭНЧИМЭГ
