Манай улс 0-18 насны 1,4 сая хүүхэдтэй. “Тэдний 60%-д буюу 648 мянган хүүхдэд хүүхдийн мөнгө олгоно” гэсэн шийдвэрийг Засгийн газар гаргаж байсан билээ.
Тэгвэл өнөөдөр энэ шийдвэрээ өөрчилж нийт хүүхдийн 80%-д буюу 860 мянган хүүхдэд хүүхдийн мөнгө буюу 20 мянган төгрөг олгож байхаар шийджээ.
Өөрөөр хэлбэл, өмнөх 648 мянган хүүхэд дээр нэмж 228 мянга орчим хүүхдэд мөнгийг нь олгох нь зөв гэж үзсэн байна. Учир нь амьдралын боломж тааруу ч зээлээр авсан хөргөгчтэй, зурагттай, машинтай байсныхаа төлөө хүүхдийн мөнгө авч чадахгүй үлдэж байсан айл өрхүүд зөндөө бий юм. Тиймээс энэ байдалд дүн шинжилгээ хийсний үндсэн дээр өнөөдөр Засгийн газар ийм шийдвэр гаргажээ.
Гэхдээ шинэ он гарснаас хойш хүүхдийн мөнгөнөөс хасагдсан хүүхдүүд мөнгөө нөхөж авах уу эсвэл энэ 4-р сарын 1-нээсээ л аваад явах уу гэдэг нь тодорхойгүй байна. Ямартай ч нийт хүүхдийн 80% -д хүүхдийн мөнгө олгоход шаардагдах хөрөнгийг төсвийн ерөнхийлөн захирагчийн 2018 оны батлагдсан төсөвт багтаан зохицуулалт хийж олгох, 2019 оноос эхлэн жил бүрийн төсөвт тусгаж байхаар тогтоолын төсөлд тусгажээ.
Одоо уг төслийг УИХ-аар хэлэлцэн баталвал хүүхдийн мөнгөнөөс хасагдаад байсан хүүхдүүд мөнгөө авч эхлэх нь ээ.
С.Шүрэнчимэг