Авилгатай Тэмцэх Газрын даргыг хуулиар хамгаалсан байдаг. Түүний бүрэн эрхийн хугацааг 6 жил гэж хуульчилсан. Энхжаргал бол томилогдоод 2 жилийн нүүрийг үзэж байна. Тэр хүсвэл биш, хуулиараа 6 жил ажиллах заалттай. Энэ бол хуулийн хамгийн чухал заалт. УИХ, ерөнхийлөгчийн сонгуулийн үр дүнгээс үл хамааран ажлаа хийх албан тушаалтан. Түүнд хэн ч, ямар ч албан тушаалтан нөлөөлөх эрхгүй, тэр тусмаа улс төрийн болон бусад зорилгоор хэн ч өөрчилж чадахгүй. УИХ-ын дарга, ерөнхий сайд, ерөнхийлөгчийн хэн нь ч нөлөөлж чадахгүй. Ийм л онцгой албан тушаалтан. Эрх дархын хувьд ерөнхий сайд, УИХ-ын дарга, ерөнхийлөгчөөс ч өндөр юм.
Тэр хоёрхон нөхцөлд л үүрэг ажлаа өгөх хуулийн заалттай. Нэгдүгээрт, эрүүл мэндийн шалтгаанаар, хоёрдугаарт, өөрөө хүсэлтээ гаргасан тохиолдолд. Бусад тохиолдолд хэн ч түүнийг оролдох эрхгүй, өөрчилж ч чадахгүй. Ямар ч улс төрийн хүчин, өндөр албан тушаалтан түүнийг "өөрийн" болгох боломжгүй. Магадгүй тааруу хүн тавьсан байж магад. Тэгвэл анх томилохдоо л анхаарах байсан юм. Тиймээс Авилгатай Тэмцэх Газрын даргыг томилохдоо л долоо хэмжиж байж нэг огтлоно гэдэг зүйр үгийг санах байсан юм. Одоо Энхжаргалыг хүчээр огцруулна гэдэг яриа байж таарахгүй. Өнөөг хүртэл АТГ-ыг нэг хүний, нэг улс төрийн хүчний мэдэлд байлгахгүйн тулд УИХ-аас томилж ирсэн. Анхны дарга Дангаасүрэн гадаадад учир битүүлгээр нас барсан. Дараагийн дарга Сангарагчааг Ц.Элбэгдорж ерөнхийлөгч болонгуутаа л "оролдсон". Түүнийг албан тушаалаа хэтрүүлсэн зүйл ангиар яллаж, шоронд хорьж байж, албан тушаалыг нь авсан. Даргаар нь Ганболдыг, орлогчоор нь Хурцыг томилсон. Хурц нь Ганболдоосоо илүү эрх мэдэлтэй, улс төрчдөд ойрхон байсныг Ганболд ажлаа өгөх үед нь олон нийт анзаарсан. Ганболд цаг бишдэж байгааг ойлгож, УИХ-ын сонгуулийн өмнө биеэ эмчлүүлэх шаардлагатай гэдгээр шалтаглан ажлаасаа чөлөө хүссэн. Түүнийг чөлөөлж одоогийн дарга Энхжаргалыг томилж, Хурцыг Тагнуулын даргаар бас томилсон.
Ийм л үйл явц Авилгатай Тэмцэх Газрын даргын эргэн тойронд өрнөжээ. Бодоход ерөнхийлөгч бүр сонирхлоо шургуулахыг эрмэлзэж ирсэн байна. Одоо Энхжаргалыг өөрчлөх уур амьсгалыг Баттулга ерөнхийлөгч зангидаж байх шиг. Эргээд саная. Энэ яадаг албан тушаал бэ? гэдгийг, очсон хүмүүс нь хаачиж вэ гэдгийг. Эхнийх нь учир битүүлгээр гадаадад нас барж, удаах нь ялтан болж, гуравдахь нь эрүүл мэндийн гэх шалтгаар ажлаасаа холдож, дөрөв дэх нь ажлаа муу хийж байна гэсэн шүүмжлэл байнд өртөж байна. Гэхдээ Энхжаргал өөрөө өргөдлөө өгөөгүй тохиолдолд түүнийг хэн ч өөрчлөх эрхгүй. Түүнд ажиллах 4 жил бий гэдгийг давхар санахад илүүдэхгүй.
Ц.ХИШГЭЭ