Ийм л нэг мессэжийг боломжит бүх сувгаар "шидэж" байна. Ерөнхий сайд нар бол ердөө л ажлын машин. Гүйцэтгэгчид. Тэд оногдох үүрэгт ажлаа л хийсэн. Хэн ч байсан тэгэх л байсан. Том төслүүдийг хөдөлгөсөн. Тэгээгүй бол татварт мөнгө орохгүй, улсын эдийн засаг элгээрээ хэвтчих гээд байсан тухай л суртал ухуулга цацагдаж байна.
-Баяраас өөр ухаантай хүн Монголд байхгүй, Бямбасайханаас өөр үр ашгийн тооцоог гаргачих судлаачид байхгүй гэж Боловсролын сайд асан Гантөмөр бас мэдэмхийрчээ. Түүнд тэгэж санагдсан байж магад. Ухаантай, ухаангүйн талаар маргах сонирхол алга. Баяр, Сайханбилэг, Баярцогт нарт улс орноо, ард иргэдээ гэх сэтгэл дутсан нь үнэн. Тэд хэзээ нэгэн цагт энэ асуудал сөхөгдөнө гэдгийг мэдэж, мэдэрч байсан. Тиймээс МАНАН-г УИХ-д, МАНАН-гийн төлөөллийг Монгол улсын ерөнхийлөгчийн суудалд аль болох удаан дархлах нь тэдний хүсэл зорилго байсан. Тэдний тооцоо алдагдаж, ерөнхийлөгчийн сонгуульд МАНАН ялагдсан. МАНАН-гийн яллахыг завдаж байсан Х.Баттулга нь Монгол улсын ерөнхийлөгчөөр сонгогдсон нь үүлгүй тэнгэрт цахилгаан цахих шиг болсон.
Нөхцөл байдал өөрийнх нь эсрэг эргэж буйг урьдчилан мэдсэн С.Баяр 461-р хорих ангид саатуулагдахаас өмнө төвийн хэвлэлд өөрийгээ өмгөөлсөн дэлгэрэнгүй ярилцлага өгч амжсан. Хэдийгээр С.Баяр бие нь муудсан, гаднаас эргэлт авахыг татгалзлаа гэж мэдэгдэж буй ч, ардаа үлдээсэн найз нөхөд, сэтгүүлчдээрээ нөгөө л зүйлээ бичүүлж, нөлөөлөхийг оролдсон хэвээр. Тэднийхээр бол С.Баяр, Ч.Сайханбилэг нар буруутан биш, гавьяатан бололтой. Авилга хээл хахуультай тэмцэх учиртай Хууль зүйн сайд нь ч мөн л ерөнхий сайд нарыг хамгаалсан иймэрхүү зүйл ярьж хэлж сууна. Ерөнхий сайд биш, хуулиараа УИХ л хариуцах ёстой гэнэ. Гэтэл тэр нь яг үнэндээ бариад авчих бие ч үгүй, амь ч үгүй. 76 гишүүн гэж 76 хариуцлага хүлээдэггүй цэцэрхсэн нэгэн этгээд бийг ард иргэд мэднэ. Хариуцлага хүлээх чадваргүй, биегүй УИХ луу асуудлыг чихэх арга замыг Хууль зүйн сайд, журмын нөхөр Нямдорж нь ийнхүү зөвлөж сууна. "Авилга авсан бол ч бас яахав, баривчилж, хорьж болно. Аваагүй. Аргагүй л гүйцэтгэсэн л" гэж сэтгүүлч нь өмөөрч бичиж байна. Баяр тийм л ухаантай юм бол улс орны эрх ашигт нийцсэн гэрээг яагаад байгуулж болоогүй юм бэ? гэж Гантөмөрөөс асууя. Авилгадаа асуудал биш. Гэрээндээ асуудал байна. С.Баяр бол англи, орос хэлийг чадамгай эзэмшсэн. Хуульч мэргэжилтэй, тэр тусмаа. Гаднынханд найр тавьсан Оюутолгойн гэрээг байгуулснаараа бахархаж буйгаа ил тод илэрхийлж буй тэр хүнээс яагаад хариуцлага асууж, шударга ёсыг нэхэж болохгүй гэж. Ч.Сайханбилэгийн тухайд ч мөн ижил. Бямбасайханаас өөр үр ашгийн тооцоог сайн гаргах хүн байхгүй гэнэ.
Гэтэл Оюутолгойгоос 4 дахин бага Эрдэнэт үйлдвэр гэхэд л нэг жилд 530 тэрбум төгрөг татварт тушаасан байхад Оюутолгой дөнгөж 230 тэрбумыг тушаасан байх жишээтэй. Үүнийг бид шударга гэрээ гэж хэлж болно гэж үү? Эзэд нь улс орноо, баялгаа мэдэх цаг ирсэн гэдгийг гаднын эдийн засгийн алуурчид, тэдэнтэй үгсэн нэгдсэн " урвагч" улс төрч ноёдод сануулах нь буруу гэж үү. Мэдлэг биш, сэтгэл дутсан юм биш үү, Монголын төрд ингэхэд...
Ц.ЭНХБАТ