Сайд дарга нар салбараа өргөж, өндийлгөх гэж томилогддогсон. Харин Бурмаа сайдын үед Монголын газар тариалан элгээрээ хэвтжээ. 2015 онд ургацын 80%-иа алдсан. Одоо ирэх намрын тариалалтын 30%-г алдчихлаа гэж Монголын үр тариа эрхлэгчдийн "Газар тариалан" холбооны ерөнхийлөгч Л.Цандэлэг, тус холбооны удирдах зөвлөлийн гишүүн Л.Чинбат нар мэдэгдлээ. Тариаланчид тариаландаа гарах бэлэн болчихсон энэ мөчид ОХУ-аас Монгол улсын бүтэн жилийн хэрэгцээг хангахуйц импортын буудай оруулж ирэх зөвшөөрлийг ХХААЯ-наас олгочихсон нь дайран дээр давс асгахтай адил болжээ. "Бидний өнгөрсөн намар хураасан буудайг нэмбэл Монголын тариаланчид хоёр жил ямар ч тариа тарих шаардлагагүй боллоо. Монголын ард түмэн Оросын тариаланчдыг 150 сая ам.доллараар дэмжлээ. Монголчуудыг гар хоосон үлдээж, Монголын газар тариаланг сөхрүүллээ" гэж тэд бухимдлаа илэрхийлж байна. Салбараа дэмждэггүй сайд Бурмаагаа ирэх сарын 1 гэхэд огцрохыг шаардана гэдгээ ч тэд хэвлэлийн бага хурлын үеэр мэдэгдэв. Тариаланчдад олгох 100 тэрбум төгрөгийн зээлийн асуудлыг дөрөвдүгээр сарын 1 гэхэд шийдэхгүй бол 4-р сарын 15-ны өдөр 10000 тариаланчдын хүрзтэй жагсаал хийх болсноо зарлалаа. Газар тариалангийн орчинд ийм үйл явдал өрнөж байна. Энэ маргаан бүтэн 2 жил үргэлжилж байгаа нь хачирхалтай.
Салбарынхантайгаа ажиллаж чаддаггүй сайдыг ингэж удаах нь хэнд ашигтай байдаг юм бэ? Сайдын суудалд очиход хандив өргөдөг гэсэн яриа бий. Түүнийг нь нөхөх боломж олгохоор хугацааг нь сунгаад байна гэж үзэж болохгүй л байх. Бурмаа сайд юу гэж тайлбарлах нь чухал биш, ажил явж байна уу, үгүй юу? гэдэг чухал баймаар. Газар тариалангийн салбарт 300,000 хүний аж амьдрал холбоотой байдаг юм байна. Хаврын тариалалт, сонгууль 2 аль аль нь хаяанд тулсан байдаг. Газар тариалангийн нутгаас нэр дэвших Засгийн газрын Хэрэг эрхлэх газрын дарга, УИХ-ын гишүүн С.Баярцогтод хийх ажил их байна. Тэр өөрөө ч бас газар тариалангийн бизнес эрхлэгч. Аль талд нь орохыг одоо харах үлдлээ. АН-д гэсэн сонгогчоо алдах гэдэг асуудал үүснэ. Уул нь Сэлэнгэ бол цэнхэрийнх гэдэг тодотголтой. Энэ өнгө хэрхэн хувирахыг тариаланчид шийддэг.
Ямар ч гэсэн Бурмаа ажил төрлөө хамгийн муу эрхэлсэн сайдаар тодроход ойрхон болжээ. Нэг сайд чухал уу, нэг салбар чухал уу? гэж асууя.
Э.ЦЭНД