УИХ-ын дарга захирамж гарган ээлжит бус чуулганыг гуравдугаар сарын 29-31-ний хооронд зарлан хуралдуулахаар болсон. Энэ сарын 29-нөөс хойш ээлжит бус чуулганыг нээхээр өглөө 9 цагаас, үдээс хойш 14 цагаас гэх мэтээр 5 дахь удаагийн оролдлого амжилтгүй боллоо. Өчигдөр УИХ-ын дарга “МАН-ын гишүүдээ маргааш дахин хуралдаандаа ирэхийг урьж байна. Маргааш өглөө 9:00 цагт танхимдаа дахин цугларъя” хэмээгээд хуралдааныг хойшлуулсан боловч өнөө өглөө дахин ирц бүрдсэнгүй.
Өчигдрийн хуралдаанаар нийт 30 гишүүн ирж, ирц 39.5 хувьтай байсан. Ирцийн байдлыг намаар нь танилцуулбал, УИХ дахь АН-ын бүлгийн 35 гишүүний 22 нь ирж, 62.9 хувийн ирцтэй байсан бол УИХ дахь МАН-ын бүлгийн гишүүдээс нэг ч хүн ирсэнгүй, ирц тэг хувьтай байсан бөгөөд МАН-ын гишүүдийн дийлэнх нь гадаадад томилолттой учраас уралдаанд оролцох боломжгүй байгаагаа мэдэгдсэн юм.
Ээлжит бус чуулганаар цацраг идэвхт хог хаягдалтай холбоотой нэр бүхий дөрвөн конвенцыг хэлэлцэхээр төлөвлөсөн. Үүнийг УИХ дахь Ардчилсан намын бүлэг дэмжиж байгаагаа илэрхийлсэн бол УИХ дахь МАН-ын бүлгийн зүгээс дэмжих боломжгүй конвенц хэмээн мэдэгдээд буй.
А.САЯН