ХҮН намыг ямар нам гэх вэ? гэж ярих хэлэх, асуух хүмүүс олширлоо. Дарга цэргээ ойр ойрхон солиод байхыг нь харахад АРДЧИЛСАН ч юм шиг. Сандал суудлаа булаацалдаад зууралдаад байхыг нь харахаар АХ нам ч юм шиг. Бий болсноосоо хойших хэдхэн сарын хугацаанд Боргил, Ганбаатар, Найдалаа, Ганболд гээд ХҮН намын дарга гэх хүмүүс тодорсоор байна. Хоёр толгойтой болоод багагүй хугацаа өнгөрлөө. Ганбаатар нь бууж өгөв үү? Яав? Ямар ч гэсэн даргын судлаасаа чимээгүйхэн холдлоо. Өөрийнхөө оронд ХҮН намынхаа санхүүжүүлэгч Алтан Дорнодын гэх Ганболдыг дарга болсон хэмээн зарлалаа. Гэвч нөгөө тал нь зөвшөөрөөгүй хэвээр. Түүнийг хуурамч Дамбийжаа гэдэг шиг хууль бус дарга гэж ХҮН намын салан тусгаарласан нөгөө хэсэг үзэж байна. Даргын суудлаас болоод, аль аль нь жигүүр нь намынхаа даргыг бүртгүүлж чадалгүй Дээд шүүхээс буцсан. Одоо бүртгүүлье гэвэл, нам дотроо эргэж нийлэх ганцхан гарц бий. Энэ асуудлаар Ганболд, Найдалаа нар хамтын ажиллагааны ажлын хэсэг байгуулсан байна. Ирэх долоо хоногоос хэтрэхгүй асуудлыг нэг тийш нь шийдэх болно гэж ажлын хэсгийн төлөөлөгчид мэдэгдлээ. Одоогоор Найдалаа, Ганболд гэсэн хоёр дарга бол ХҮН намын дарга нар биш, зөвхөн л хоёр жигүүрээ л хариуцаж буй ноёнтнууд ажээ.
Тэд хэзээ нийлж, хамтарсан нэг дэвэлт хийх бол гэж гишүүд, дэмжигчид нь хүлээж буй бол, өрсөлдөгчид нь түүнийг хүсэхгүй байна. Хоноц хоноцдоо дургүй, хонуулсан хүн хоёуланд дургүй гэдэг болж байна.
Д.ЭНХТҮВШИН