Учир шалтгаан олон байж болох. Гол шалтгааны нэг нь улс төрчид өөрсдөдөө зориулсан шийдвэр гаргадагт оршдог гэсэн таамгийг судлаач Даваасүрэн гэгч эмэгтэй гаргажээ. Үнэн л болов уу. Сонгуулийн хууль. Өөрсдөдөө л зориулсан. "Жудагт Монгол" хөдөлгөөний тэргүүн, АИХ-дарга асан Гомбожав "Сонгуулийн хууль бол сонгогчдод зориулсан СОНГОХ хууль биш, УИХ-ын гишүүдэд зориулсан СОНГОГДОХ хууль" гэж шүүмжилсэн. Эдийн засгийн өршөөлийн хууль, мөн л ижил. Ерөнхийлөгчийн сонгуулийн хууль, бас л ялгаагүй. Эрх мэдлээ авчихна, дахиад л өөрсдөдөө зориулсан хууль журмаа батлаад л явна.
Ийм нэг гинжин урвал хөврөөд байх болсон. Эрх баригчид бүгдийг өөрсдөдөө ашигтай хувилбараар шийддэг болсон. Дэлхийн улс оронд чинээлэг иргэддээ чиглэсэн барууны маягийн, ядуу болон бага орлоготой иргэддээ чиглэсэн зүүний маягийн бодлого хэрэгжүүлдэг бол Монголд зөвхөн эрх дархтануудад зориулсан бодлого хэрэгждэг гэж судлаачид ийнхүү үзэх болжээ. Тэр нь "уул уурхай, барилга, банк, төрийн эрх мэдэлтэн" гэсэн гинжин урвал юм. Монголын хөгжлийг хэрсэн энэ гинжин холбоог хэн хэзээ таслах бол оо гэж харж суух биш, хувь нэмрээ оруулах цаг ирсэн гэж иргэд дуу хоолойгоо нэгтгэх болжээ.
Д.ОТГОНБАЯР