Сүүлийн үед улс төрийн маш идэвхтэй үйл ажиллагаа явуулж байгаа хоёр хүн байна. Нэг нь МоАХ-ны тэргүүн, УИХ-ын гишүүн Х.Баттулга. Нөгөө нь МоАН-ын тэргүүн, УИХ-ын гишүүн Лу.Болд. Лу.Болдыг АТГ-аас шалгаж байгаа. Баттулгыг саяхнаас шалгах болсон. Баттулга С1 телевиз, Ардчилал, Монголын мэдээ зэрэг өдөр тутмын томоохон сонин хэвлэлийг эзэмшдэг. Лу.Болд өөрийн эзэмшлийн Eagle tv, Боловсрол телевиз, News.mn мэдээллийн сайтад хувь эзэмшдэг байснаа өгсөн. Шинээр "Өглөөний сонин", Politik.mn мэдээллийн сайт, телевизийн студи байгуулсан. Ямар ч гэсэн өөрийн гэсэн үзэл суртлын зэвсгээ бий болгоод амжсан. Түүний зорилго бол унтсан нийгмийг сэрээх гэж тэр хэлж байгаа. Өөрсдөдөө албан тушаал хуваарилдаг, энэ нийгэм мухардалд орсон. Намууд хувьчлагдсан. Ээлжилж засагт гардаг улс төрийн хүчнүүд, эсвэл засагт ороогүй үлдэгсэд гомдогсод, хэлмэгдэгсэд, тэдний хоорондын тэмцэл л өнөөгийн улс төрд байна. Улс төр бохирджээ. Ингэж тэр өнөөгийн нийгмийн дүр төрхийг дүгнэж байна. Лу.Болд хамгийн олон удаа УИХ-д сонгогдсон, хамгийн олон удаа засгийн газарт сайдаар ажилласан нэгэн. Өнөөдөр тэр өнгөрсөн 25 жилд бүтээснээ бүрэн үгүйсгээгүй ч, нийгмээ хурцаар шүүмжилж, 25 жилийн дараа дахин тэмцэж эхэллээ. 1990 оюутнууд нийгмийг өөрчлөхөд идэвхтэй оролцсон. Ийм цаг өнөөдөр иржээ гэж Лу.Болд оюутнуудад хандсан байна. Тэр өөрийн байгуулсан МоАН-аа, өчигдрийн МоАХ-ны үргэлжлэл гэж үзэж байна. Х.Баттулга ахмад гишүүдийг, Лу.Болд оюутнуудыг хөдөлгөж, нийгмийн өөрчлөлтөд идэвхтэй оролцохыг уриалж эхэллээ. Энэ хоёр нэг санаатай байна уу? Нэгдэх үү, энэ хоёр? Цаг үеийн шаардлагаар ингэж таараад байна уу? гэдгийг удахгүй ялгах, салгах цаг ирнэ.
Тоймч Д.ГАНТУЛГА
