Чуулганы нээлтийн өмнө Н.Алтанхуяг мэдэгдэл өнөөдрийн гол сэдэв болж байна. Тэрээр хаалттай чуулганд хэлэх гэсэн үгээ нээлттэй хэлэхээс өөр аргагүй байгаагаа хэлсэн юм. Түүний энэ мэдэгдэл Засгийн газраа огцруулуулж, багийнхнаа баривчлуулсан хүний үг мөн үү, мөн. Хүн бүхэн мэддэг ч, хэн ч ил хэлдэггүй хуйвалдааны ар тал, хууль бус үйл ажиллагаандаа хууль хяналтын байгууллагыг татан оролцуулагч, хүний эрхийг зөрчиж баривчлуулан хорьж, айлган сүрдүүлж бизнес, албан тушаал, ажлыг нь булаагч хуйвалдааны бүлэглэлийн удирдагчаар Ц.Элбэгдоржийг шууд нэрлэлээ. Тэрээр хууль бус хонгилыг одоогийн Ерөнхийлөгч бий болгон өөрт таалагдаагүй хэн бүхнийг тэрхүү хонгилоороо оруулж байгааг өгүүлэв. Ийнхүү хэлснээрээ гэр бүл өөрийн хүмүүстээ аюул дагуулж байгаа ч айхгүй гэдгээ мөн нэмж хэлсэн юм.
Харин удалгүй Ерөнхийлөгч Ц.Элбэгдорж твитер хуудсаараа дамжуулан хамтарч ажиллая гэсэн утгатай зүйлийг жиргэлээ. Монголын төрд үүсээд байгаа талцал, хуваагдал, бүлэглэлийн “зодоон” нэгэнт ил болоод зогсохгүй одоо эрчээ авч байгааг энэхүү үйл явдлаас харж болохоор байна. Төрийн толгойд гарсан хэдхэн том бүлэглэлээс одоогийн Ерөнхийлөгчийн урт хар гар хаа сайгүй хүрдэг гэдгийг улс төрийн хүрээнийхэн ярьдаг ч хэн ч ил ийнхүү хэлж байгаагүйгээрээ Н.Алтанхуягийн энэ үйлдэл зориг гаргасан хэрэг болов. Нөгөө талаар улс төрийн томоохон хагарлын үүдийг Н.Алтанхуяг нээлээ ч гэх хэсэг байна. Одоо харин үйл явдал хэрхэн өрнөхийг иргэд харж байна. Бүлэглэлүүд бие биеэ мөхөөх нь Монголын улс төр цэвэршихийн цондон гэж зарим хэсэг баярлаж байгаа ч хөшигний хард юу болохыг жирийн иргэд мэдэхгүй нь харамсалтай...
Х. АЯЛГУУ
