“Уламжлалт тусгаар тогтнол” холбооноос УИХ-ын гишүүн Н.Алтанхуягийг төрийн нууц задруулсан гэх үндэслэлээр шалгуулах хүсэлтээ Тагнуулын ерөнхий газрын дарга, хошууч генерал Б.Хурц, Ерөнхий прокурор М.Энх-Амгалан нарт хүргүүлэхээ мэдэгдлээ. Түүнийг хоёр шалтгааны улмаас шалгуулах гэнэ.
Нэгд. “2013 онд АТГ-аас МУ-ын Ерөнхий сайд асан, УИХ-ын гишүүн Н.Алтанхуяг, төрсөн охин А.Саранзаяа, хүргэн Г.Дэнзэн нартай холбоотой хэргийг шалгаж эхэлтэл тухайн үед Ерөнхий прокуророор ажиллаж байсан Д.Дорлигжав хүчингүй болгосон. Чухам ямар үндэслэлээр хэргийг хүчингүй болгосныг ард түмэн мэдэх ёстой” гэх үндэслэлээр.
Хоёрт. “2014 оны зургадугаар сарын 20-ний өдрийн УИХ-ын нэгдсэн хуралдаанаар төрийн нууц задалж, УИХ-ын гишүүн Б.Шинэбаатарын өрөөнөөс чагнах төхөөрөмж илэрсэн гэж хэлсэн. ТЕГ-т чагнах, тагнах төхөөрөмжийг шаардлагатай тохиолдолд ямар ч албан тушаалтны өрөөнд суулгаж болно. Хуулиараа энэ эрх тагнуулын байгууллагад олгогдсон байдаг учир төрийн нууц задалсан” гэж үзэн дээрх хоёр асуудлыг шалгаж өгөхийг ТЕГ-ын дарга Б.Хурцад уламжилжээ.
А.САЯН
