Анх удаа 2012 оны УИХ-ын сонгуульд МАХН оролцоод эвслээрээ 13 суудал авсан нь түүхэн амжилт юм. Энэ жил энэ амжилтаа ахиулахыг МАХН санаархаж байгаа.
Гэвч энэ намыг тойрсон балаг дуусдаггүй. Он гараад намын ерөнхий нарийн бичгийн дарга Г.Шийлэгдамба баривчлагдсан. Төдөлгүй, намынхаа даргын заавраар ажилласнаа хүлээж, намын даргаа хуулийнханд "барьж " өгсөн. Төдөлгүй, тус намын санхүүчийг саатуулж, намынх нь санхүүгийн үйл ажиллагааг зогсоосон. Дараа нь намын аж ахуй хариуцсан дарга П.Цогтбаатарыг мөн саатуулж, шалгасан. Тэгтэл намынх зүтгэлтэн С.Дашдондог гэгч, намынхаа даргаас 500 сая төгрөг нэхэж, хуулийн байгууллагад хандсан. Удаагүй байтал, тус намаас УИХ-д сонгогдсон Л.Цог бас л даргыгаа авилгын хэрэгт буруутгасан ярилцлагыг телевизэд өгсөн.
Дараа нь АТГ-аас намын дарга Н.Энхбаяраас мэдүүлэг авах шаардлагатай гэсэн албан тоотыг Н.Энхбаярт гардуулсан. Ийм явц л өнгөрсөн хаваржингаа өрнөлөө. Төгсгөлд нь МАХН-ын дарга Н.Энхбаяр эмчлүүлэх шаардлагатай хэмээн Солонгос орныг зорилоо. Түүнийг онгоцны буудал дээр АТГ, мөрдөх байцаах албаныхан тосож байсан учир намын удирдах бүрэлдэхүүн тэр чигтээ Буянт-Ухаа онгоцны нисэх буудал дээр очсон гэдэг. Түүнийг хил гаалиар гарахад тодорхой саад тотгор үүссэн тул, Монголын маш нөлөө бүхий хүнтэй утсаар удаан хугацааны турш ярьсны дараа хил нэвтэрсэн тухай мэдээллийг одоо хүртэл нууцалсаар байна. Даргыгаа долоо хоноод ирнэ гэж хэвлэлд ярилцлага өгч байсан Тулгын яриа хэлбэр төдий "хоосон яриа" байжээ гэж судлаачид хэлж байна.
Харин Тулга : "Н.Энхбаяр даргыг өмгөөлөгчгүй болгосон. Одоо хамгаалагчгүй болголоо" гэж Н.Энхбаярын хамгаалагч Мөнхөөг баривчилсны дараа хэллээ. "Н.Энхбаярын хүсэл зоригийг мохоох гэж хийж буй зохион байгуулалттай үйлдэл" гэж тус намынхан үзэж байгаа юм байна. Энэ бүхнээс харахад, МАХН сонгуульд хэрхэн оролцох, дарга нь ирэх эсэх нь маш бүрхэг болжээ.
Тоймч Д.ГАНТУЛГА
