.jpg)
Монголчууд сүйхээтэй. Наймаачин сэтгэлгээтэй, бас. Хятадууд идэж болох бүх зүйлийг л иддэг. Нисэж байгаагаас онгоц, мөлхөж байгаагаас галт тэрэгнээс бусдыг нь иддэг гэж хошигнох дуртай. Харин монголчууд, арилжиж болох бүх зүйлийг арилжиж байна.
Хамгийн сүүлийн жишээ бол Тусгаар Тогтнолын Намыг худалдаалсан мэдээ чих дэлсэж эхэллээ. Энэ намыг буюу, тус намын оноосон нэрийг Женко бүлэглэлийнхэн авсан гэж ойрын эх сурвалж мэдээллээ. Энэ намд Женко Х.Баттулгаас гадна намаасаа гарсан УИХ-ын гишүүн Г.Уянга нэгдээд байгаа. Энэ намын хувьд, 2016 оны сонгуулиар УИХ-д суудалтай нам болох, тэгснээрээ 2017 оны ерөнхийлөгчийн сонгуульд оролцох эрхээ халааслах гээд улс төрийн нүүдлүүд анзаарагдана.
Гэхдээ энэ нам сонгуульд орохоос өмнө, намыхаа Их хурлыг хийж, намын даргаа албан ёсоор Дээд Шүүхэд бүртгүүлэх ажил бий. Энэ явц бас л хугацаа шаардах учраас, алга хөрвүүлэхтэй адил бүтэмжтэй байна гэж хэлэхэд бэрх. Ямар ч гэсэн шинэ нам үйл ажиллагаагаа эрчимжүүлэх нь ойлгомжтой. Женкогийн гэх олон төрийн бус байгууллага энэ намын улс төрийн үйл ажиллагааг дэмжинэ гэж судлаачид дүгнэж байна. Харин энэ намаараа сонгуульд оролцож чадах эсэхэд эргэлзэх хүмүүс цөөнгүй.
