Метал рок чиглэлээр уран бүтээл туурвидаг “The Hu” хамтлаг нь 2016 онд байгуулагджээ. Хамтлагийн ахлагч Ц.Галбадрах, гишүүн Б.Энхсайхан, Г.Нямжанцан, Н.Тэмүүлэн нарын бүрэлдэхүүнтэй.
Нэрний тухайд ХҮН буюу “HUMAN“ гэдэг үгнээс үүдэлтэй. Тэд Монголын уламжлалт хөгжмийг метал рок чиглэлтэй хослуулан уран бүтээлээ туурвидаг бөгөөд одоогоор 2 дуу гаргаад байна.
Тус хамтлагийн гишүүд нь дуу хөгжмийн мэдлэг, туршлагатай мэргэжлийн уран бүтээлчид юм. Хамтлагийнхан өөрсдийн хэв шинжийг “Хүннү рок” хэмээн тодорхойлжээ.
“Wolf Totem” дууны видео клип фэйсбүүк сүлжээнд хүчтэй тарсны үр дүнд Биллбордын хард рок дууны дижитал борлуулалтын жагсаалтыг тэргүүлжээ. Дөрөвдүгээр сарын 20-ний байдлаар “Wolf Totem” дуу нь “Hot Rock Songs” жагсаалтын 22 дугаарт эрэмбэлэгджээ.
Мөн “Yuve Yuve Yu” уран бүтээл youtube үзэлт нь 14 сая үзэлттэй байна.
“The Hu” хамтлаг одоогоор “Gereg” нэртэй анхны цомгоо гаргахаар Eleven Seven Records студитай хамтран ажиллаж байна.
Уг хамтлагийн продюссерээр МУГЖ Б.Дашдондог ажиллаж байна.
С.ШИНЭСАР