Өнгөрсөн жил хамгийн өндөр рейтингтэй улс төрчөөр тодорч байсан УИХ-ын гишүүн С.Ганбаатар "сагасан". Тэр оны зааг дээр ХҮН-ын даргаар сонгогдож, намаа 2016 оны УИХ-ын сонгуульд үнэмлэхүй ялалтад хүргэж, засгийн эрхийг авч, 2017 онд дараалсан ялалтаа байгуулж Монгол улсын ерөнхийлөгчөөр сонгогдоно гэж хэлсэн. Түүний энэ үг хоосон мөрөөдөл байжээ. Богинохон хугацаанд, ХҮН хэмээх шинэ, тортоггүй намыг тэр шороотой хутгаад одсон байна. Хэдхэн сарын дотор, С.Боргил, С.Ганбаатар, Б.Найдалаа, Т.Ганболд гэсэн дөрвөн даргын нэр зүүж, гар дамжиж, нам нь хоёр хэсэг хуваагдсаны эцэст сая нэг эргэж нийлжээ. Лам олдохгүй бол буцахдаа зална гэдэг шиг Боргилыгоо дахин сонгосон мэдээллийг CONTROL.MN-д ирүүллээ.
Тус нам дахин Дээд шүүхэд хүсэлт гаргасан байна. Өнөө маргаашдаа бага хурлаа хийж, мөрийн хөтөлбөрөө батлах, хэн нэгэнтэй эвсэх үгүйгээ шийдэхээр ханцуй шамлан оржээ. С.Ганбаатарын хувьд ХҮН-ыг орхиж бие даахаар шийдсэн сурагтай. Харин тус намын хөрөнгө оруулагч болох нь илэрсэн Т.Ганболд хэрхэх нь одоохондоо тодорхойгүй ажээ.
Тоймч Д.ЭНХТҮВШИН