МАХН-ын Бага чуулган эхэллээ. Уг чуулганаар 2016 оны УИХ-ын сонгуульд дэвшүүлэх мөрийн хөтөлбөр, МАН-тай эвсэж сонгуульд оролцох талаар хэлэлцэх ажээ.
Мөн өнөөдөр МАН-ын Бага хурал хоёр дахь өдрөө үргэлжлэх юм. Өчигдрийн хурлаар 2016 оны УИХ-ын сонгуульд дэвшүүлэх мөрийн хөтөлбөрөө хэлэлцэж, гишүүдийн саналыг сонсон, орон гарсан гишүүдийн оронд шинээр Бага хурлын гишүүдийг батламжилсан. Тухайлбал, УИХ-ын гишүүн Ц.Даваасүрэн, Х.Болорчулуун, Монгол банкны тэргүүн дэд ерөнхийлөгч асан Б.Жавхлан, Сүхбаатар аймгийн МАН-ын хорооны дарга н.Энхтөр, н.Мөнгөншагай нарыг Бага хурлын гишүүн болгосон юм.
Харин Ардчилсан намын Үндэсний зөвлөлдөх хорооны хуралдаан өчигдөртөө өндөрлөсөн. Тус хуралдаанаар мөн 2016 оны УИХ-ын сонгуульд дэвшүүлэх мөрийн хөтөлбөрөө хэлэлцэн баталсан юм. Энэ талаараа тус намын генсек Л.Эрхэмбаяр өнөөдөр сэтгүүлчдэд мэдээлэл хийнэ.
А.САЯН