МАН-аас хэвлэлийн хурал зарлаж, бага хурлаар хэлэлцсэн асуудал болоод гарсан шийдвэрийн талаар сэтгүүлчдэд мэдээлэл хийлээ. МАН бага хурлаараа 2016 оны УИХ болон орон нутгийн сонгуульд оролцох мөрийн хөтөлбөрөө баталж, өнөөдөр Үндэсний аудитын газар хүргүүлжээ.
Харин эвсэх нийлэх тухайд, энэ удаагийн сонгуулиар эвсэж чадахааргүй болсон ч цаашид эвсэх, хамтрах асуудал байсаар байх болно, ингэхийн төлөө хичээж ажиллана гэдгээ МАН-ын намын дарга М.Энхболд дуулгалаа.
МАХН-тай эвсэж, зөвшилцөх асуудал дээр хоёр намын ажлын хэсгийн дарга нар санал нийлж энэ сарын 17-нд эвсэж сонгуульд оролцохоор гарын үсэг зурсан. Гэвч МАХН-ын дарга Н.Энхбаяр хүлээн авах боломжгүй хэмээн үзэж, гурван зүйл дээр өөрчлөх саналыг ирүүлсэн, тавьж байгаа шаардлага нь эвсэх хүсэлгүйг нь илтгэсэн зэргээс үндэслэж, Удирдах зөвлөл, Бага хурлаар асуудлыг хэлэлцээд МАН сонгуульд дангаараа оролцох шийдвэр гаргасан хэмээн мэдээллээ.
А.САЯН