МАХН-ын дарга Н.Энхбаяр тус намын Ерөнхий нарийн бичгийн дарга Ж.Сүхбаатар, намын дэд дарга Э.Эрдэнэжамъяан, нарийн бичгийн дарга Б.Тулга нар мэдээлэл хийлээ.
Энэ үеэр МАХН аль ч нам эвсэлтэй нэгдэхгүй сонгуульд дангаараа оролцоно гэдгээ албан ёсоор мэдэгдэв. Намын дарга Н.Энхбаяр, эвсэж нийлэх тухайд МАН анхнаасаа МАХН-тай эвсэж сонгуульд орох хүсэлгүй байсан нь батлагдсан гэв. Тэрээр энэ сонгуульд нэр дэвших болсноо мөн дуулгалаа. Түүнийг ялтайд тооцох хугацаа байгаа байхгүй гэсэн асуудал олны сонирхлыг татаад байгаа юм. Харин үүнд өөрөө ийм тайлбар өгч байна.
“2009 оны Өршөөлийн хуулиар надад хүчээр тулган, хэлмэгдүүлж байсан 263 гэдэг зүйл өршөөлд хамрагдсан. Тиймээс ялтайд тооцох асуудал байхгүй. 2015 оны Өршөөлийн хуулиар надад тулгаж байсан 150.3 гэдэг зүйл хамрагдсан учраас ялтай байдал өршөөгдсөн. Гэтэл үүнийг улс төржүүлээд, Н.Энхбаяраас айгаад сонгуульд оруулахгүй гэсэн атгаг санаа өвөрлөсөн өндөр албан тушаалтнууд энэ асуудлыг хиймлээр бий болгож, эргэлзээ төрүүлж, сонгуульд оролцуулахгүй байх хүслээ биелүүлэх гэж зүтгэж байна. Би ялгүй”
А.САЯН
