УИХ гишүүн Н.Номтойбаярыг албан тушаалаа урвуулан ашиглаж Хөдөлмөр эрхлэлтийг дэмжих сангаас УИХ-ын нэр бүхий гишүүдийн хамаарал бүхий компаниудад зээл олгосон байж болзошгүй, мөн Г.Батхүү агсны хэрэгт хамааралтай хэмээн гишүүний бүрэн эрхийг түдгэлзүүлэх хүсэлтийг УЕП-газраас УИХ-д хүргүүлсэн. Улмаар халдашгүй байдлын дэд хороо хуралдаж гишүүний бүрэн эрхийг түдгэлзүүлэх шаардлагатай хэмээн үзсэн.МАН-ын Хяналтын ерөнхий хорооноос УИХ-ын гишүүн Н.Номтойбаярыг олон нийтийн газар биеэ зохисгүй авч явсан буюу бусадтай маргалдаж, зодолдсон гэх хэргийг нь үндэслэн намаас хөөсөн. Харин УИХ-ын Төрийн байгуулалтын байнгын хороо хаалттай горимоор УИХ-ын гишүүн Н.Номтойбаярын бүрэн эрхийг түдгэлзүүлэх шаардлагагүй хэмээн үзсэн. Тэгвэл өнөөдрийн Уих –ын чуулганы нэгдсэн хуралдаанаар эцсийн шийдвэрийг гаргана. Чуулган хаалттай горимоор хэлэлцэж эхэлсэн бөгөөд УИХ-ын гишүүн Б.Пүрэвдорж чуулганыг нээлттэй явуулах горимын санал гаргаж, санал хураалт явуулахад дэмжигдээгүй байна. Ингэснээр чуулган хаалттай хэвээр үргэлжилж УИХ-ын гишүүн Н.Номтойбайрын бүрэн эрхийг түдгэлзүүлэх саналыг 30 гишүүн дэмжиж, 28 гишүүн татгалзсан байна. Ингээд УИХ-ын гишүүний бүрэн эрхийг түдгэлзүүлэх тухай тогтоолын төслийг батлах санал хураалт явуултал олонхын дэмжлэг авч чадаагүй байна.ХаринН.Номтойбаяр гишүүн “УИХ-ын гишүүнээс чөлөөлөгдөх хүсэлтээ өгнө” гэж мэдэгдсэн. Ингэж хэлснийхээ дагуу тэрээр дөнгөж сая чөлөөлөгдөх өргөдлөө өгсөн байна.
О.Гоо-Оюун
