Одоо хүчин төгөлдөр мөрдөгдөж байгаа Харъяатын тухай хууль 1995 онд батлагдсан тул одоогийн нийгмийн шаардлагыг хангахгүй гэж үзсэний улмаас Ерөнхийлөгч энэхүү хуулийн төслийг өргөн барьсан юм.
Гэвч энэхүү хуулийг иргэд олон нийт ихээхэн эсэргүүцэж байгаа юм. Тэдний үзэж байгаагаар 1072 хувьцаа хөдөлгөөнд орох болон газар хувьчлал хараахан дуусаагүй байхад энэхүү хуулийг батлах нь сөрөг нөлөөтэй гэж үзэж байгаагаа олон нийтийн сүлжээгээр илэрхийлсээр байна.
Харин хууль санаачлагчдын зүгээс 1995 оноос өнөөг хүртэл 16 000 орчим давхар харъяалалтай иргэдийн 6000 орчим хүүхдийн асуудлыг шийдвэрлэхэд хүндрэл үүсээд байгаа тул хүнээ алдах бус авч үлдэх зорилгоор энэхүү хуулийг яаралтай батлах шаардлагатай гэж үзэж байгаа юм. Уг хуулийг Монгол Улсын үндэсний аюулгүй байдлын үзэл баримтлалд нийцүүлэн шинэчлэн найруулах зайлшгүй шаардлагатай хэмээн Ерөнхийлөгчийн Тамгын газрын дарга П.Цагаан мэдэгдсэн байна. Хуулийн төсөлд, Монгол Улсын иргэнээс төрсөн хүүхэд дэлхийн хаана ч төрсөн Монголын иргэнээр бүртгүүлэх, гадаад хүнтэй гэрлэсэн Монгол хүний хүүхэд Монголын харъяат байхаар заасан гэж хууль санаачлагчид тайлбарлажээ. Хуулиар Монгол Улс давхар харъяалал олгохгүй юм байна.
Х. АЯЛГУУ
