Монгол улсын Ерөнхийлөгч Х.Баттулга өчигдөр 2020 оны УИХ-ын ээлжит сонгуулийг түр хойшлуулах санал гаргасан. Үүнтэй холбогдуулан УИХ-ын гишүүн О.Баасанхүү өөрийн байр суурийг илэрхийллээ. Тэрээр Ерөнхийлөгчийн саналтай танилцсан. Би түүнийг улсын төсвийг тодотгох, төрийн удирдлагыг гартаа авах, сонгуулийг хойшлуулах гурван хүсэлтэй байна гэж ойлгосон. Гэхдээ сонгуулийг хойшлуулах нь Ерөнхийлөгчид л ашигтай, өөр хэнд ч ашиггүй. Сонгуулийг хойшлуулж болохгүй. Харин ч урагшлуулах ёстой. Явах хүнээр ачаа бүү татуул гэх үг бий. Иргэд шинэ парламентаас их зүйл хүлээж байна. Зээлийн хүүг царцаах, хойшлуулах гэх мэт шийдлийг ард иргэд дэмжиж байгаа. Гэвч энэ Засгийн газар хийхгүй байна. Юм хийхгүй байгаа Засгийн газрыг түргэн буулгах нь зөв. Харин төсөв тодотгох хэрэгтэй гэдэгт санал нэг байна. Тэвчиж болох зардал, жишээлбэл цэцэрлэгийн багш нарт нөүтбүүк авч өгөх гэхчлэн санхүүжилтийг танах бол өөр хэрэг. Харин сонгууль явуулах төсвийг тодотгоно гэдэг утгагүй. Хойшлуулсан ч нэг л өдөр энэ сонгуулийг хийж таарна.
О.Гоо-Оюун
