Улс төрд нэг хөл тавьсан, амт мэдрэмжийг нь авсан хүн түүнээсээ салахгүйг хичээдэг. Яаж түүнийгээ уртасгах вэ? гэдэг ч боддог л зүйл.
Үүнийг ганц С.Ганбаатар биш бүгд л бодож санаж байгаа. С.Ганбаатар улс төрд хурдан орж ирсэн шигээ хурдан гарах үйлдлээ өөрөө л хийсэн.
Зөв зүгээр явж байсан ХҮН-ыг "самарчихсан". Одоо тэр нам хэн ч биш болсон. Гишүүд нь бие даагч болж хувирсан. С.Ганбаатар ч өөрөө "юмыг яаж мэдэх вэ?" гээд бас л бие даагчаар хэдийнээ бүртгүүлсэн гэж мэдээлэл бий. Одоо түүнд тулах түших саваа ч байхгүй болсон. 2012 оны сонгуулиар МҮЭ-ийг тулах тулгуураа болгосныг иргэд мэднэ. Энэ жил ХҮН намыг сууриа болгох цахилгаан төлөвлөгөө нь нэгэнт нурсан.
Одоо тэр Оюутолгойн гэрээг яриад ч дэмжлэг авахгүй. Яагаад гэвэл, энэ гэрээг өнөөдөр хэн ч өөрчилж чадахгүй. С.Ганбаатар байтугай, ерөнхийлөгч Ц.Элбэгдорж ч энэ гэрээг өөрчилж, зогсоож чадахгүй. Маш муу, хортой гэрээ болсон уу? гэвэл мэргэжлийн хүмүүс "тийм" гэж зөвшөөрдөг. Энэ бол С.Ганбаатарын сэдэв биш болсон.Тэр жинхэнэ утгаараа бие даагч боллоо. Түүнд боломж олгосон. Сайхан боломжийг тэр өөрөө үгүй хийлээ. Түүний улс төр дэх нас нь үнэхээр богинохон эсэхийг 55 хоногийн дараа харах үлдлээ.
Д.ЭНХТҮВШИН