Шинэ коронавируст халдвар буюу Covid-19 цар тахал дэлхий нийтийг айдаст автуулж буйг бид бүгд нүдээр харж, чихээр сонсож байна.
Тухайлбал: Дэлхий даяар сүүлийн 24 цагийн хугацаанд 80,889 шинэ тохиолдол бүртгэгдэж, нийт халдвар авсан хүний тоо 3,562,260 хүрлээ. Мөн нас баралт 3,430-аар нэмэгдэж, нийт нас барагсдын тоо 248,093 , эдгэрсэн хүний тоо 1,153,050 болсон байна.
Манай улсын тухайд 38 тохиолдол бүртгэгдэж, халдварын тархалтыг хянах хүрээнд авч хэрэгжүүлэх бүх арга хэмжээг авч байна. Иймд ч хөл хорио буюу өндөржүүлсэн бэлэн байдлын хугацааг 5 дугаар сарын 31 хүртэл сунгаж, сургууль цэцэрлэгийн үйл ажиллагааг 9 дүгээр сарын 1 хүртэл түр зогсоож, зарим үйлчилгээний газруудын үйл ажиллагааг түр зогсоосон.
Гэтэл Улаанбаатар хотын дарга С.Амарсайхан энэ бүх шийдвэрийг сөрж, эрсдэл дагуулсан, ард иргэдийн эрүүл мэнд, аюулгүй байдлыг умартсан "Хорлон сүйтгэх" шийдвэр гаргалаа. Тодруулбал: Архи, согтууруулах ундаагаар үйлчилдэг дэлгүүр, цэнгээний газруудын үйл ажиллагааг нээж, ажиллах цагийн хуваарийг 07:00-00:00 цаг болтол сунгасан.
Боловсрол олгох тэнхимийн сургалтыг нээгээгүй атлаа, баар цэнгээний газрыг урьтаж нээсэн хотын даргын шийдвэрийг иргэд эсэргүүцэж ихээхэн бухидамж буйгаа цахим орчинд илэрхийлсээр байна.
Фитнесст нэг дор 10-аас олон хүн үйлчлүүлэхгүй, автобусанд хоёр метрээс хол зайтай зорчих хэрэгтэй гэж уриалж байсан атал асар их эрсдэл дагуулсан шийдвэр "Ашгийн төлөө" юу ?
Хөл хорио тогтоож бар, цэнгээний газруудын үйл ажиллагааг зогсоогоод байсан энэ үед бизнес эрхлэгч нар орлогоо алдаж зээлээ төлж чадахгүйд хүрч туйлдсан нь үнэн. Иймд ч хотын даргын гаргасан шийдвэрийн дагуу уухайн тас үйл ажиллагаагаа нээсэн хоёр ч газар "Тусгай зөвшөөрлөө цуцлуулсан" юм. Иргэдийг олноор цуглуулж, бөөгнөрөл үүсгэсэн гэх үндэслэлээр. Бар цэнгээний газар болсон хойно олон хүн цуглалгүй яахав. Түүгээр ч зогсохгүй архидан согтуурах нь мэдээжийн хэрэг. Ийм байхад нөгөө 2 метрийн зай ариутгал халдваргүйжүүлэлтийн дэглэм сахих нь худлаа. Халдвар тархах эрсдэл нэмэгдэнэ.
Энэ нь С.Амарсайхан дарга цаг үеэ олоогүй мэдрэмжгүй шийдвэр гаргасны хор уршиг. Иймд хотын дарга та харалган шийдвэрээ эргэн харж, цуцлах нь зүй ёсны хэрэг юм.
Ард иргэдийн эрүүл мэнд, нийслэл хотын амар тайван, аюулгүй байдлыг умартсан С.Амарсайхан дарга танд
"Covid-19 " цар тахлын эсрэг тэмцэж. Монгол улсын аюулгүй байдал, эрүүл энхийн манаанд зогсож буй алба хаагчдийн нөр их хөдөлмөр хичээл зүтгэл. Төр засгийнхаа шийдвэрийг хүндэтгэн үзэж, хөл хориог зөрчилгүй гэртээ амар тайван байгаа мянга мянган гэр бүлийг хүндэтгэн үзэхийг Control.mn сайтын зүгээс хүсэж байна.
Т.Хуншагай