Сонгууль хаяанд иржээ. Эвсэл задардаг танил үйл явц эрч хүчээ авлаа. Шударга ёс эвслийн гишүүд нь МАН болон АН-ыг сонгох болсон тул “Шударга ёс” эвсэл задарлаа.
“Шударга ёс” эвслийн гишүүн Г.Уянга “Тусгаар тогтнол нам”-ын даргаар сонгогдож, Л.Цог, Г.Уянгыг бараадаж, Ч.Улаан, Д.Тэрбишдагва нар МАН-ыг сонгосноо зарласнаар эвсэлд албан ёсоор цэг тавилаа.
Өмнө нь Д.Батцогт АН-д элссэн, МҮАН-ын үлдсэн М.Сономпил, Н.Батцэрэг нар АН-аас нэр дэвшихээр тохиролцсон үйл явц өрнөж байна. Дор дороо амь амиа хичээсэн, дахин зөөлөн суудал дээр суучих улс төрчдийн тулга тойрсон нүүдлийг төвөггүй харж болохоор байна. Эвсэл задарсантай холбогдуулан МАХН-ын тодотголтой бүхий л албан тушаалыг хураан авах үйл ажиллагаа энэ өдрүүдэд өрнөх нь тодорхой боллоо. Шадар сайд Ц.Оюунбаатар, Батлан хамгаалахын сайд Ц.Цолмон, Барилгын хот байгуулалтын сайд З.Баянсэлэнгэ, цааш нь улбаалаад МХЕГ-ын дарга Ц.Шаравдорж, Шударга өрсөлдөөний газрын дарга Д.Мөнхтөр гээд ажлаа өгөх албан тушаалтнуудын нэрс тодрох нь ээ. Дээр нь Эрүүл мэндийн яамны сайдыг бас томилох эрхийг МАХН-аас хураалаа. Хүлээгдэж буй сайд нараас С.Ламбааг хамгийн ойрын үед томилогдох сайд гэж олон нийт хүлээж байна. Сонгууль хаяанд иржээ.
Ц.БАТТУЯА
