Бүх үйл явц нэг л зүйлд чиглэж байна. МАХН-ыг жижиглэх, Намбарын хүүг дахин улс төрд гишгүүлэхгүй. Ийм л үйл явцад чиглэсэн улс төрийн нүүдэл ар араасаа хөвөрч байна. Сонгуулийн хуулийг ч өөрчлөх боломжтойгоор батлах, баталсан хуулиа дахин өөрчлөх. Эвслийг нь задлах, гишүүдийг нь урвуулах. Энэ бүхнийг улс төрийн урьдчилан харсан, нарийн тооцоолсон нүүдэл гэж зарим нэгэн улс төр судлаачид үзэж байна.
Сонгууль дөхсөн учир, намууд дор бүхнээ судалгаа хийж буй. Энэ судалгаа ч бас нөлөөлсөн байх учиртай. Тэмүүлж байж хийсэн, дэвшил авчрах сонгуулийн хуулийн холимог системээс татгалзаж, мажоритар буюу улирсан тогтолцоог сонголоо. Эрх баригчид сонгогдох, эрх мэдэлдээ үлдэх цорын ганц найдвар бол сонгуулийн хууль л боллоо гэж хөндлөнгийн ажиглагчид ч дүгнэж байна. 2016 оны сонгуулиас эрх баригчид болгоомжилж байна. Н.Энхбаяраас болоод, бүх жижиг намыг улс төрийн тавцангаас хүчээр шахах бодлого хүчтэй хэрэгжиж эхэллээ гэж жижиг намын төлөөлөгчид бухимдаж байна. Улс төрийн нүүдлүүд Намбарын хүү Энхбаярыг тойрон эргэлдэх нь энэ ажээ. МАХН-д нь сонгуульд оролцох эрхийг олгосон. Харин нэр дэвшигчийн үнэмлэхийг нь олгох эсэхийг харах цаг үлдлээ.
Д.ОТГОНБАЯР