Үе үеийн ерөнхийлөгч өөрийг нь дэвшүүлсэн намаа хагалж ирсэн. Н.Багабанди ч, Н.Энхбаяр ч Монгол улсын ерөнхийлөгчөөр сонгогдсоны дараагаас эхлэн МАН-ыг (тухайн үеийн МАХН) л хагалж , зодолддог байсан. Тэгснээрээ сөрөг хүчиндээ байнга ашигтай байдал бий болгодог уламжлал тогтсон. Шалтгаан нь энгийн. Ерөнхийлөгч болонгуут намаа дотор нь хагалаад, хагалсан хэсгээ сөрөг хүчинтэй нийлүүлж барьж байгаад өөрийнхөө хүсэл эрмэлзлийг хэрэгжүүлэх гэж оролддог. Сөрөг хүчинд байнга нээлттэй, бодлогыг нь дэмжиж, харин өөрийнхөө намыг байнга хагалж, хязгаар тавьж тоглодог. Энэ үйл явц мөн Ц.Элбэгдоржийн үед ч хэрэгжсэн. Одоо Х.Баттулгын үед ч үргэлжилж л байна.
Энэ бол намаасаа Ерөнхийлөгч гаргасан намын үүрч ирсэн зовлон. Ерөнхийлөгч нь өөрийнхөө нэр дэвшиж сонгогдсон намыг шууд миний халаасны нам гэж үзээд, эсрэг намын ая, эвийг олж байх ёстой гэсэн тооцоогоор тоглоод ирэхээр нам байнгын хэрүүлтэй, тэр хүний гар дүрсэн байдлаар явдаг. Энэ бол манайд бий болсон улс төрийн эрх мэдлийн буруу хуваарилалт, системийн хор уршиг гэж хууль зүйн сайдаар ажиллаж байсан Тэмүжин дүгнэлээ.
