Намд тодорхой зорилгоор элсдэг. Тэр тусмаа МАН-ын дарга, ерөнхий сайд У.Хүрэлсүхээс намын батлахаа гардан авна гэдэг бол бүр учиртай. Учиргүй юм байдаггүйн жишээ бол Наранбаатар сүр дуулиантайгаар МАН-д элссэн явдал юм. Тэр өмнө нь АН-ын гишүүн, Дарханы АН-ын даргаар ажиллаж байсан. Зорилго нь тодорхой. Дарханаас УИХ-д нэр дэвших. Тэгвэл Наранбаатар АН-ын дарга, УИХ-ын дарга З Энхболдын өмнөөс оймсоо тайлан шидсэн нь ч учиргүй биш. Түүнийг З. Энхболд үл дэмжин, Дарханы АН-ын даргаар батламжлахаас тухайн үед татгалзсан нь ийм үйлдэлд хүргэсэн гэдэг. Тэгвэл нам, улс төрөөр оролдож буй Наранбаатарын бизнес, түүний орлого нь юу вэ? Тэр ложистикийн компанитай. Тэр компани нь Монголын уул уурхай, тэр дундаа нүүрсний компаниудаас угжаастай явж ирсэн. Олон жилийн өмнөөс түүний зохиож ирсэн " Coal-Mongolia " арга хэмжээнийх нь гол спонсорууд нь Энержи ресурс, Эрдэнэс Таван Толгой, Моннис, Эрдэнэт УБҮ зэрэг томоохон компаниуд байсан. Энэ компаниуд л гол санхүүжилтийг нь хийж ирсэн. Тэгвэл энэ оноос эхлэн Наранбаатар энэ арга хэмжээгээ зохион байгуулж чадахаа больсон. Ковид ч нөлөөлсөн. Тэгсэн ч гэсэн Наранбаатар уул уурхай, тэр дундаа Эрдэнэс Таван Толгой ХК-аас салахыг хүсэхгүй байна. Тэр 1072 гэсэн акц өрнүүлсэн. Одоо тэрбээр Эрдэнэс таван толгой ХК-ийн ТУЗ-ын гишүүн болохыг хүсэж байна. Энэ л зорилгоор тэр эрх барьж буй МАН-д элссэн байна. Тэр өөрөө ч өргөдлөө өгсөн байна.
Энэ бол түүний захидал. Сийрүүлбэл:
Миний бие “Эрдэнэс Тавантолгой” ХК-ийн ТУЗ-ийн хараат бус гишүүний сонгон шалгаруулалтад холбогдох материалуудыг хугацаанд нь өглөө. 4 гишүүнийг сонгох ба миний хувьд уул уурхайн мэргэжлийн чиглэлээр нь өрсөлдөх юм. Сонгон шалгаруулалтад заасан нийтлэг болон тусгай шаардлагуудыг бүрэн хангаж байгаа. 1072-ын холбоо хоёр жил гаднаас нь тэмцсэн, дотор нь ороод хяналтаа тавьбал илүү үр дүнд хүрэх болов уу. Шалгаруулалтад мөн холбооны ажлын албаны дарга М. Алзахгүй хөрөнгийн зах зээлийн чиглэлийн гишүүнд өрсөлдөхөөр материал өгсөн байгаа. Шалгаруулалт, ил тод, шударга явагдна гэж найдаж байна.
Ингэж Наранбаатар бичжээ. Мөн дэмжлэг хүсжээ гэж ойлгогдов. Юм учиртай гэж энэ аж.
Ц. БАТ-ЭНХ
