Ням гарагт Киргизстанд парламентын сонгуулийн санал хураалт явагдаж, 120 суудлын төлөө улс төрийн 16 намын нэр дэвшигчид өрсөлдсөн юм. Урьдчилсан дүнгээр аль ч нам олонх болж чадаагүй бөгөөд суудал авах саналын босгыг давсан таван нам эвслийн засгийн газар байгуулах нөхцөл бүрэлджээ.Гэтэл эдгээр таван намын дөрөв нь одоогийн эрх баригч нам болон түүний талыг баримтлагч улс төрийн хүчнүүд байгаа нь сөрөг хүчнийхний хүчтэй эсэргүүцэлтэй тулгарсан байна. Тэд эрх баригчдыг сонгуулийн үр дүнг луйвардсан гэж үзсэн учир тэмцэл өрнүүлж, Парламент бол ерөнхийлөгчийн байрладаг төрийн ордныг хүчээр гартаа оруулж чаджээ. Тэмцэгчид өмнөх ерөнхийлөгчийг Атамбаевыг ч сулласан байна. Атамбаев нь 2011-2017 онуудад Киргизстаны ерөнхийлөгчөөр ажиллаж байсан юм. Одоогийн ерөнхийлөгч Сооронбай Жээнбековын тушаалаар 2019 оны наймдугаар сард түүнийг Кой-Таш тосгон дахь гэрээс нь анх баривчилсан. Түүнийг авлигын хэрэгт буруутгаснаас гадна баривчлагдах үедээ хууль хүчнийхэнд эсэргүүцэл үзүүлсэн, аллага зохион байгуулсан, хүн барьцаалсан, гэмт хэргийн бүлгийн толгойлогчийг шоронгоос сулласан зэрэг ял тулгаж, 11 жилийн хорих ял оноогоод байсан юм. Тэгвэл босогчид түүнийг чөлөөлжээ. Одоогийн ерөнхийлөгч Сооронбай босогчдын эсрэг гал нээхгүй , нөхцөл байдлыг хурцатгахгүй тушаал буулгаснаа мэдэгдээд байна гэж ИТАР-ТАСС агентлаг мэдээллээ. Киргиз улс нь таван стан дотроо хамгийн ардчилсан гэж нэрлэгдэж буй. Ард түмний амьдрал нь доройтсон, эрх мэдэлтнүүд нь авилгад идэгдсэн, улс орон нь өрөнд идэгдсэн зэргээрээ манай Монгол улстай ижил төстэй юм. Ялгаа нь ард иргэд нь нэгдэж, босож, тэмцэж, эрх мэдэлтнүүдээ унагаж чаддаг ард түмэн. Одоогоор Киргизийн ард түмэн 3 ерөнхийлөгчийг түлхэн унагатлаа тэмцэж өрнүүлж чадсан.
Тэмцлийн үр дүнд луйврын сонгуулийг хүчингүй болгож, дахин сонгууль явуулах болсон байна. Сонгуулийг 14 хоногийн дотор зарлаж, 60 хоногт багтаан сонгуулийг явуулах болжээ.
Т.Оргил
