Засаг захиргаа, нутаг дэвсгэрийн нэгж, түүний удирдлагын тухай хуулийн төслийг МАН давамгайлсан УИХ энэ өдрүүдэд хэлэлцэх тов гарсан. Хэлэлцэхээр зэхэж буй тус хуулиар аймаг, нийслэлийн Засаг даргыг Ерөнхий сайд ИТХ-д санал болгож, ИТХ хэлэлцэн батлахаар тусгасан. Энэ заалтыг хууль санаачлагчид эсэргүүцэхдээ: - Засаг даргыг албан тушаалаар нь барьцаалах, Иргэдийн төлөөлөгчдийн хурлын эрх мэдлийг хумих сул талтай гэж мэдэгдэж байсан. Батлагдах шинэ хуулиар Засаг дарга нарын томилгоо Ерөнхий сайдаас шууд хамааралтай болно. Орон нутгийн сонгуулиар АН олонх болсон найман аймаг, Нийслэлийн Сүхбаатар дүүргийн Засаг даргыг ч МАН-ын дарга, Ерөнхий сайд У.Хүрэлсүх санал болгох нөхцөл бүрджээ. Хуулийг МАН олонхоороо хүч түрэн, ийнхүү завхруулж байна. Мөн дээрх хуулийн төслийг анх өргөн барихдаа хэрэгжих хугацааг 2022 он гэж товлосон ч , хоёр жилээр урагшлуулж, 2020 оны аравдугаар сараас мөрдүүлэхээр өөрчилсөн нь бүр ноцтой.
Э.ОТГОО
