Л.Энх-Амгалан ерөнхийлөгч Баттулгын шагналын бодлогыг шүүмжиллээ. Төрийн шагнал, одон, медалийн үнэ цэн унаж буйн гол шалтгаан нь төрөөс олгож буй одон медаль нь намын одон медаль болж хувирсанд оршино. Намын үзэмжээр шагнал гардуулдаг боллоо. Шагнал дэндүү хавтгайрсан. Энгэр дүүрэн одон медальтай хоёрхон ард түмний нэг нь Монгол болсон. Дээр нь шагнал бол шударга ёсны хэмжүүр юм. Монголын одон медаль шударга ёсны хэмжүүр болж чадахгүй байна гэж УИХ-ын гишүүн Л.Энх-Амгалан чуулганы хуралдааны үеэр байр сууриа илэрхийллээ. Ингэж хэлэх гол шалтгаан нь Энх-Амгалан MCS компанийн үүсгэн байгуулагч Ж.Оджаргалд хөдөлмөрийн баатар цол олгоогүйтэй холбоотой гэдэг тайлбарыг түүний ойр тойрны хүрээлэл хийж байна. Энх-Амгалан нь MCS компанийн эрх ашгийг хамгаалагчийн нэг. Ганбаатар, Хүрэлбаатар нарт хөдөлмөрийн баатар цол олгосон хэрнээ Ж.Оджаргалыг тойрсонд тэр дургүйцлээ илэрхийллээ гэж үзэж болно.
Энх-Амгалан. MCS компанийн хэвлэх үйлдвэрийн захирлаар ажиллаж эхэлсэн цагаас Оджаргалтай ойртсон. Хожим MCS компанийн гол таван захирлын нэг болсон. Улсын Их Хуралд гурав дахь удаагаа сонгогдсон. Баянхонгор аймгаас сонгогдсон Спирт Бал Бурам компанийн захирал Элдэв-Очирын хамт MSC компанийн эрх ашгийг УИХ-д хамгаалж байсан.
Д.БАТЖАРГАЛ
