Монголчууддаа оффшор дансны талаар мэдлэг олгож сая доллараа татваргүй бүсэд мартаж орхисон С.Баярцогтдоо өнөөдрийг хүртэл хариуцлага тооцоогүй Ц.Элбэгдорж гэнэт ухаан оров бололтой. Сонгуулийн өмнө ухаан санаа нь сэргэж ард түмнээ хошгоруулдаг эрхэм ерөнхийлөгч маань “С.Баярцогт бол төрд гай болж байна. Би түүнд сонгуульд нэр дэвших хэрэггүй. Шалгуул гэж хэлсэн" гэжээ.
АНУ, Канад, Япон, Энэтхэг, Украйн зэрэг улсуудын засгийн газраас оффшор данстай нь илэрсэн өөрсдийн иргэд, компаниудад хариуцлага тооцох, хэргийг мөрдөх тусгай комисс байгуулж шийдвэрлэхээ мэдэгдсэн. Тухайлбал Канадын сангийн сайд Даяна Либотилиур (Diane Lebouthillier) асуудалд нухацтай хандаж нарийвчлан шалгах, шаардлагатай бол эрүүгийн гэмт хэрэг гэж үзэн хэрэг үүсгэх болно гэдгээ мэдэгдээд байгаа.
Францын ерөнхийлөгч Франсуа Олланд оффшор данс нь илэрсэн Францын иргэд, ялангуяа улс төрчидтэй хатуу хариуцлага тооцож, хуульд заагдсан бүх л шийтгэлийг хүлээлгэх болно гэдгээ мэдэгдэж байсан.
Испанийн аж үйлдвэрийн сайд Хусе Сориа (Jose Manuel Soria) Оффшорт бүртгэлтэй компанид хувь эзэмшиж байсан нь илэрсэн тул огцорсон гээд гадны улс орнуудад хариуцлагыг хатуу тооцдог.
Гэтэл манай ерөнхийлөгч оффшор данстнууддаа зөвлөгөө өгөөд сууж байна. Ц.Элбэгдорж ерөнхийлөгч үнэхээр ард түмний хэлж байгаачлан оффшор данстай хүмүүсийн хөрөнгийг нь хурааж, хариуцлага тооцох хэрэгтэй гэсэнтэй санал нэг байгаа юм бол дорвитойхон ажил болгох хэрэгтэй. Өөрийнхөө хүч хөдөлмөрөөр хөрөнгөтэй болсон нэгэн оффшор данстай болсон нь тунаад л үлдэнэ биз.
Л.ГАНТУЯА
