Улс төрчид "Нэгдүгээрт, эх орон, хоёрдугаарт эх орон, гуравдугаарт эх орон, түүний ашиг сонирхол" гэж хэлэх ёстой хүмүүс. Гэтэл нэгдүгээрт хувийн эрх ашиг, хоёрдугаарт намын эрх ашиг, гуравдугаарт улс орны эрх ашиг гэдэг болчхоод байна.
Ийм хандлагыг улс төрчдийн ая занг, хандлагаас төвөггүй харж болно. Тэд юу ч гэж "донгодсон" хувийн эрх ашгаа л өмнөө тавьсан байдаг. Ц.Даваасүрэн, Ч.Улаан, Д.Тэрбишдагва нарыг МАН-аас дэвшүүлэхгүй болсон тул тэд "амиа бодож" МАХН-д элсэж, хүрд эргүүлцгээсэн. УИХ-д сонгогдсон. Хожсон уу гэвэл хожсон. Гэхдээ сонгогчид биш, тэд нар л. Д.Арвин асуудал үүсэнгүүт мөн л АН руу шилжилт хийсэн.
Бие даагчдыг бие даасан дуу хоолойтой байгаараа гэж сонгосон атал Х.Болорчулуун, С.Ганбаатар, Ц.Даваасүрэн нар намын сонголтоо хийлээ. Хэзээ ч би нам сонгохгүй гэж хэлж ярьж байсан С.Дэмбэрэл хоёр дахь нам руугаа үсэрч эхэллээ.
Тэдэнд түших тулгуур, өгсөж дэвших шат гишгүүр хэрэгтэй байна. Тэд хүрсэн өндөрлөгөөсөө буухыг хүсэхгүй байна. Дахиад нэг ч удаа болов "сонгогдчихмоор" байна, тэд. Одоо харин намаа сольсон, үзэл бодлоосоо урвасан, сонгогчдынхоо сэтгэл зүйгээр тоглосон тэднийг хэрхэхийг сонгогчид л шийднэ. Нэг урвасан хүн хоёр дахиа урвадаг гэдэг.
ТОЙМЧ Д.ГАНТУЛГА