Одоогийн 76 бүгд л дэвшчих, дахиад 4 жил сонгогдчих хүслээ нуухгүй явна. Намын дарга нарынхаа өрөөнөөс гишүүд холдохоо больсон. Дэвшчих, тэгээд боломжийн өрсөлдөгчийг "сугалчих" санаатай л ордныг гороолсоор, даргыгаа эргүүлдсээр. Одоогийн 76-аас хэд нь дахин сонгогдохыг хэлж мэдэхэд бэрх. Сонгогчид дүнгээ тавихаар зэхэж байна. Олонхи нь сайн дүн авахгүй гэж эмээж байна. Гэхдээ л дэвшчихвэл, "Яаж ч магад" гэдэг горьдлого тэднийг улайрахад хүргэжээ. Одоогоор хэд хэдэн хүн асуудалтай байгаа. Ерөнхий сайд асан Н.Алтанхуяг, Женко Х.Баттулга, Лу.Болд нарын дэвших асуудал бүрхэг байгаа. Дээр нь Р.Бурмаа сайдад дэвших асуудал хүндэрсэн гэх мэдээлэл байна. Ерөнхийлөгч бас нэг гишүүнийг дахин дэвшүүлэхгүй байхыг уриалсан. Энэ бол дэвших л юм бол Сэлэнгээс хаалтгүй гарч ирэх С.Баярцогт сайд. Түүнийг дэвшүүлж болохгүй гэж Монгол Улсын ерөнхийлөгч Ц.Элбэгдорж өөрийн биеэр мэдэгдлээ. Ингэхлээр АН-аас гэхэд л 4 гишүүн дахин дэвшихгүй байх магадлал үүсчээ. Баярцогтыг дэвшихийг ил эсэргүүцэж буй хүний нэг бол Х.Баттулга. Ордонд ийм л нэг бужигнаан өрнөж буй тухай CONTROL.MN -д мэдээллээ.
Ц. БАТТУЯА
