Сонгуулийн нэг цикл дуусжээ. Гурван сонгуульд (УИХ, Орон нутаг, Ерөнхийлөгч) дараалан ялалт байгуулсан эрх баригч МАН-д амсхийх сайхан боломж олджээ. МАН-ын 100 жилийн ойгоо Улсын наадмын өмнө өргөн тэмдэглэж амжсан эрх баригч намын удирдлагууд Монгол наадмаас татгалзлаа. Тэд гэр орондоо 9 хоног амарч, алжаалаа тайлахаар зэхэж байна.
УИХ-ын зарим эмэгтэй гишүүдийн Ковидын эсрэг санаачилга, No Naadam хөдөлгөөний эсэргүүцлийг үндэслэн тулгар төр байгуулагдсаны 2230, Улс хувьсгалын 100 жилийн Улсын баяр наадмын үйл ажиллагааг МАН-ын даргаар удирдуулсан Засгийн Газар цуцаллаа. Монгол төрт ёсны үйл ажиллагаа, Монголын ард түмний уламжлалт соёлыг түүхэндээ анх удаа тасалдууллаа.
Цахим наадам хийнэ гэж зарласан шийдвэрээсээ Засгийн газар гэнэт ухарч, уяачид, харваачид, бөхчүүдийн бүтэн жилийн хөдөлмөрийг үрэн таран хийлээ. Бөхчүүд, Харваачид, Уяачдыг зугаацагчид аятай үзлээ. Наадмыг тэдний л зугаа цэнгэл гэж эндүүрлээ. Наадам бол төрийн үйл. Мянга мянган жилийн уламжлалт Монгол төрийн үйл, ёс заншил, уламжлал соёлыг ч уландаа гишгэхдээ ч сийсэнгүй. МАН Монгол улсад ахин сонгууль болохгүй мэт аашилж, Монголын төр, засагт ямагт МАН дангаараа ноёрхох болсон мэт эндүүрлээ. Наадам хийхийг хориглосон. Дээр нь үнэ ханшийн өсөлт, санхүүгийн дарамтыг ард иргэддээ наадмын " бэлэг " болгон гардууллаа. У.Хүрэлсүхийг ерөнхийлөгчийн тангараг өргөсөн, түүний залгамжлагч Оюун-Эрдэнийг намын дарга болсноос хойш нэг долоо хоног ч өнгөрөлгүй шатахууны үнэ 25-30 % нэмэгдлээ. Шатахууныг дагууд өргөн хэрэглээ, хүнсний барааны үнэ 10-30 нэмэгдэж, тэр хэмжээгээр Монгол төгрөгний ханш уналаа. Ард иргэдэд үнийн дарамт үүслээ.
Худалдагч бид үнээ нэмээгүй. Бүх үйлдвэрүүд үнээ нэмсэн. Гурил ба гурилан бүтээгдэхүүн үйлдвэрлэдэг компаниуд гаднаас зарим бүтээгдэхүүнээ авдаг гэнэ. Хоёр хоногийн өмнөөс бүх гурилан бүтээгдэхүүний үнэ 10-30 хувь өссөн гэж Амгалан захын талхны худалдагч эмэгтэй хэлсэн.
Тэгвэл бүх төрлийн хүнсний ногооны үнэ ч мөн адил 10-30 хувь өссөн гэж тус захын ногооны худалдагч өгүүлсэн. Монголын төсвийн мөнгийг сонгуульд ялалт байгуулах атгаг санаагаар баруун солгойгүй цацсан эрх баригчдад ард түмний амьдрал уруудан доройтох нь нэгэнт хамаагүй болсон байна. Өргөн хэрэглээний барааны үнэ ханш өсөх нь одоо МАН-аас томилогдсон Засгийн газрын сонирхох татах асуудал биш болжээ.
Тоймч Ц.ЭНХБАТ