Урд шөнийн 00.00 цаг хүртэл хуралдсан АН-ын ҮЗХ-ийн шийдвэрээр АН-аас УИХ-д нэр дэвших 76 хүний 13 нь эмэгтэйчүүд болж байна. Жендэрийн тэгш эрхийг эрхэмлэж төрийн дээд удирдах байгууллагад эмэгтэйчүүдийн оролцох оролцоог хангахыг намууд тодорхой түвшинд тавьж байгаа.
Намын бүсгүйчүүддээ тойрог хувиарлах асуудал нэлээд ширүүн маргааныг үүсгэж байсан сурагтай.
Жишээ нь : Сүхбаатар дүүрэгт М.Батчимэг гишүүн нэр дэвшихээр болж Р.Амаржаргал гишүүн нэр дэвшихээс татгалзсан байна. Мөн дуучин Г.Эрдэнэтунгалаг Сэлэнгэ аймгийн 26-р тойргоос нэр дэвшиж, тус аймагт нэр дэвшихээр горилж байсан Тариаланчдийн холбооны тэргүүн Л.Цандэлэг АН-ын ҮЗХ-ны шийдвэрээр жийгджээ.
Түүнчлэн УИХ-н сонгуулийн 33 тойрог буюу Увс аймгаас нэр дэвшихээр горилож намын анхан шатны байгууллагаас дэмжлэг аван ҮЗХ-ны хуралд орж ирсэн С.Пүрэвсүрэн гэх бүсгүйн оронд Баянмөнх аваргын охин Б.Сүрэнжав дэвшихээр болсон байна. Үүнд нь ундуйцсан С.Пүрэвсүрэн "Х.Баянмөнх аваргын хийж бүтээсэн бүхнийг мэддэг болохоос түүний охины тухай мөхөс би дэмжих гээд ямар хүн гэдгийг тодорхойлох гээд хайгаад, бодоод ч олсонгүй, дүрийг нь ч би таньсангүй. Өчигдөр болсон АН ҮЗХ хуралд очоод нэр дэвшиж буй ихэнх эмэгтэйчүүдийг хараад өөрийгөө тэдэнтэй харьцуулан хийсэн ажилтай, хэлэх үгтэй хүн гэдгээ мэдэрсэн төдий. АН МАН томчууд хоорондоо ярилцаж гишүүний суудлаа нэгэндээ бэлэглэхээр тохироо явагдаж хэдэн эмэгтэйчүүдийг золигт гаргадаг гэдгийг нүдээрээ хараад ой гутаж суулаа гэж өөрийн фэйс хуудсандаа бичиж.
АН-аас нэр дэвшиж чадаагүй эмэгтэйчүүд нь нэр дэвшиж байгаа бүсгүйчүүдээ үгүйсгэж байгаа нь илт. Намын дотоод хагарлаа далдалж намжуухан хийсэн ҮЗХ-ны хурлын зөрчилдөөн энэ мэтээр зухалзаж байна.
Ямартай ч эмэгтэйчүүдээ нэр дэвшүүлэх гэж сонгогдох шаанстай цөөнгүй эрчүүдээ АН-ынхан тойргын гадна үлдээж байх шиг байна. Магадгүй бүсгүйчүүддээ зайгаа тавьж өгсөн залуус ирэх засгийн газарт сайдын суудалд залрах нь лавтай.
Л.ГАНТУЯА