Энэ жилийн эх үрсийн баяр сонгуулийн жилтэй давхцаж буйгаараа онцлогтой.
Эмэгтэй гишүүдийг дэмжих, эмэгтэйчүүдийг төрийн өндөр албанд томилох, эрх барих дээд байгууллага УИХ-д дэвшихэд нь квотыг нь нэмэгдүүлэх гээд дэс дараатай ажил өрнөсөөр байна. Энэ дундаас онцгойрсон нэгэн эрхэм бол Р.Амаржаргал байлаа. Ардчилсан намын лидер, тухайн үедээ намаа ч даргалж, засгаа ч тэргүүлж байсан, хэлэх үгээ хэнээр ч заалгадаггүй, зангарагтай улс төрч гэгдэх Р.Амаржаргалыг УИХ-д нэр дэвшихийг бүгд л хүлээж байсан. Өрсөлдөгчид нь түүнээс бас болгоомжилж байсан.
Гэтэл тэр нэрээ татлаа. Өнгөрсөн сонгуулиар АН-ын бас нэгэн лидер Э.Бат-Үүл УИХ-д нэрээ дэвшүүлэхээс татгалзаж, нийслэлд намаа авч орон ялалт байгуулж байсан. Энэ үйлдлийг Р.Амаржаргал санагдууллаа. Баттай биш боловч, найдвартай эх сурвалжаас, Р.Амаржаргал нь 2017 оны ерөнхийлөгчийн сонгуульд өрсөлдөх тохироогоо намтайгаа хийсэн сураг дуулдлаа.
АН-ын хувьд 2017 онд Монгол улсын ерөнхийлөгчөөр хэн сонгогдох нь амин чухал асуудлын нэг. 2016 оны УИХ-ын сонгууль АН-д ямар ч үр дүн авчирсан бай, ерөнхийлөгчийн сонгууль бол намын хувьд ч, улс орон, ард түмний хувьд ч хамгаас чухал гэдгийг таахад тийм ч хэцүү биш. Тиймээс АН ерөнхийлөгчийн сунгаанд нөөх цөөн хүний нэгийг Р.Амаржаргал гэж үзсэн байх магадлалтай.
Түүнээс гадна ерөнхийлөгчийн сунгаанд тус намын дарга З.Энхболд, тус намын нийслэлийн дарга Э.Бат-Үүл нарын лидерүүд оролцохыг улс төр судлаачид үгүйсгэхгүй байна. Ямар ч гэсэн, шахагдаж хоцорсон М.Батчимэг гишүүнд өөрийнхөө тойргийг найр тавин өгсөн жентелемэн гэж Р.Амаржаргалыг нэрлэх боллоо.
Эх, үрсийн баярын өдөр Р.Амаржаргалыг дурсах ийм нэгэн шалтгаан байлаа. Монголын эх, үрсдээ CONTROL.MN -ийн хамт олны зүгээс аж жаргал, эрүүл энхийг хүсэн ерөөе.
Э.ДОЛЗОДМАА
