Сүүлийн 4 жилд Шонхорынхон хүчирхэгжсэн. УИХ -д З.Энхболд, С.Эрдэнэ, Арвин, Одонтуяа, Ганбат, Батцогт, Батзандан, Ганхуяг, Баярсайхан нарын 8 гишүүнтэй болсон нь тус фракцийг нөлөө бүхий болгосон. Тус шонхор фракцын ерөнхийлөгчөөр З.Энхболд ажиллаж байгаад С.Эрдэнэд сонгуульт ажлаа шилжүүлсэн. Фракцгүй нам гэж тус намын дарга дарга З.Энхболд хичнээн ч тунхагласан АН фракц дээрээ тогтож, шийдвэрээ гаргадаг дэгээ орхиогүй гэж судлаачид дүгнэж байна. Өнгөрсөн дөрвөн жилийн хугацаанд тус фракцаас С.Эрдэнэ, Ганхуяг, Баярсайхан нар Засгийн газрын гишүүнээр томилогдон ажиллаж, Батзандан, Ганбат , Батцогт нар Байнгын хорооны даргаар ажилласан. З.Энхболд өөрөө АН -ын дарга болж, С.Одонтуяаг АН-ын эмэгтэйчүүдийн байгууллагын даргаар сонгуулж чадсан гэж хэвлэлд бичдэг. Тэд бүгдээрээ давхар албан тушаалд хүрсэн. Шонхор хэт хүчирхэгжиж байгаа нь АН -ын бусад фракцийн эгдүүцлийг төрүүлэх болсон байна. Ялангуяа, ҮЗХ -д шонхорын зүгээс шинэ гишүүдийг олноор оруулж ирсэн нь асуудалд анхааралтай хандахад хүргэсэн гэж эх сурвалж мэдээлж байна. Шонхорын фракцийн УИХ дахь бүх гишүүд хүссэн тойргоо авсан, шонхорын үндсэн бүрэлдэхүүн Баянголд төвлөрсөн. Түүний зэрэгцээ шонхорын зүгээс ҮЗХ -д дөнгөж татаж оруулсан ЕТВ-ийн эзэн, бизнес эрхлэгч Ч.Даваабаярыг мөн Өвөрхангайд дэвшүүлж чадсан. Гэвч энэ бүхэн тодорхой хэмжээний эсэргүүцэлтэй тулгарч эхлэв бололтой. Эмэгтэйчүүдийн квотыг нэмэх шаардлагатай гэсэн үндэслэлээр шонхорын гишүүн Ч.Даваабаярыг өнгөрсөн амралтын өдрүүдэд Өвөрхангайн тойргоос хасаж, өөр нэр дэвшигчийг дэвшүүлэхээр болжээ.
Улс төрийн намууд энэ сарын 4-ныг хүртэл хугацаанд сул гэж үзсэн нэр дэвшигчдээ солих хуулийн заалттай юм байна. Мөн Увс аймагт Баянмөнх аваргын охин Сүрэнжавыг нэр дэвшигчээс нь татсан тухай мэдээллээ.
Д.НАРАНБААТАР
