Монголын Уламжлалын Нэгдсэн Нам гурав дахь хүчний орон зайг нөхөхөөр хөдөллөө. Бусад намтай нийлж, нэгдээгүй тэд сонгуульд дангаараа оров. Цөөн нэр дэвшигч дэвшүүлсэн нь зөв гэж ажиглагчид дүгнэлтээ бичиж эхэлжээ.
Эх оронч О.Дашбалбарын нэртэй МУНН салшгүй холбоотой. УИХ-д ганц гишүүнтэй байсан ч тэд улс төрийн амьдралд маш нөлөөтэй байж чадсан. 50-лаа болсон Ардчилсан Холбоо Эвсэл, 25-уулаа байсан МАХН ч чухам шийдвэр гаргах үед заавал МУНН-ын төлөөлөл, ганц гишүүн болох О.Дашбалбараас дэмжлэг авах шаардлага тулгарч байсныг эргэн санахад илүүдэхгүй.
Өнөөдөр МУНН намынхаа дарга Батдэлгэрийн Батболд тэргүүтэй 9 төлөөлөгчийг УИХ-д нэр дэвшүүллээ.
Бие даасан нам хамгийн цөөн хүн нэр дэвшүүлсэн анхны тохиолдол гэж тэмдэглэж болох. Тус намын дарга Б.Батболд нь Баянзүрх дүүргийн 51-р тойрогт нэр дэвшсэн байна. Эх орон, газар шороо, тусгаар тогтнолыг эрхэмлэдэг МУНН, тус намын дарга Б.Батболд, нарийн бичгийн дарга Л.Жаргалсайхан, гишүүн багш Б.Арго нар бүгдээрээ батлан хамгаалах, хилийн цэрэг, хүчнийхэн ажиллаж амьдардаг тойргийг сонгосон нь санамсаргүй хэрэг биш гэж түүний хамтран зүтгэгчид мэдэгдлээ. Тэд нэр дэвшигчдээ бүгдийг нийслэлийн тойрогт сойсон нь, хөдөө орон нутагт МАН, АН-ыг хүчрэхгүй гэж тооцоолсон бололтой. Тиймээс бүх хүчээ нийслэлд төвлөрүүлсэн гэж ажиглагчид дүгнэв. МУНН энэ удаа гурав дахь хүчний байр суурийг эзлэхийн төлөө сонгуульд орж буйгаа ийнхүү илэрхийллээ.
Л.ГАНТУЯА