АН нийслэлд ялбал Хотын даргаар Э.Бат-Үүлийг томилно гэж 4 жилийн өмнө хэлж байсан. Иргэд итгэж, АН-ыг дэмжиж, Э.Бат-Үүлд хотын тамгыг атгуулж, сан хөмрөгөө даатгасан. Түүнээс хойш 4 жил өнгөрчээ. Хийсэн ч ажил бий байх. Хэлсэндээ хүрээгүй ч зүйл байгаа байх. Үүнийг нийслэлийн иргэд 2 долоо хоногийн дараа дэнслэх болно. Иргэд ямар шийд гаргахыг хэлж тааж мэдэхгүй. Харин хотын дарга, нийслэлийн захирагч Э.Бат-Үүл тамгаа алдахыг хүсэхгүй байна. Тэр дахин хотын даргаар ажилламаар байна гэдэг өргөдлөө иргэдэд гаргалаа. Тэгэхийн тулд АН-ыг нийслэлд дахин олуулаа болгож өгнө үү гэж тэр хүсэв. Тэр итгэлтэй байх шиг байна.
Эдийн засгийн Яамны хариуцаж гүйцэтгэсэн "Гудамж" төслийг хот өөрийн хийсэн ажил гэж тайлбарлахыг хичээнэ гэж юм мэдэх хүмүүс хэллээ. "Гудамж" төслийн хүрээнд хот, хөдөөд хийсэн ажил мундахгүй. Хотын олон уулзварыг шинэ дүр төрхтэй болгосон. Энэ бол нийслэлд хамаарагдахгүй ч, АН-д харьяалагдах төсөл. Тиймээс энэ төсөл аль хот, аль аймагт амжилттай хэрэгжсэнээс хамаарч, тэр хот, аймгийн удирдлага дахин сонгогдох магадлал бий. Харин утаатай бол тэмцэж чадаагүй. Хор нь буурсан л гэж хэлэхээс өөр хариулт олоогүй. Замын түгжрэл хэвээрээ. Дугаарын хуваарь хийсэн ч өөдөлсөн зүйлгүй. Итгэл найдвар болсон гэр хороолол төсөл замын тэг дунд гацсан. Гээд яривал, сөхвөл олон зүйлийг ил гаргаж болно. Хотын иргэдийн татвар, төлөөс харин нэмэгдсэн. Хотын дарга, түүний орлогчдын хувьд их ажил амжуулсан гэж итгэлтэй байгаа бололтой. Одоо харин ямар дүн тавихыг харах цаг ирлээ. Хотын дарга бол хотын дарга болчихоод байгаа юм, Монголд. Өөр улсад бол хотынхоо иргэдийн зарц байдаг. Хотын дарга болмоор байна уу, хотын зарц хиймээр байна уу? гэж хотын удирдлага болохыг эрмэлзэж буй хүмүүсээс асууя даа. Сонгогдсон хойно нь, иргэддээ олддоггүй тэднээс асуух гээд ч нэмэргүй.
Д.ГАНТУЛГА
