Монгол улсын шадар сайд Ү.ХҮРЭЛСҮХ : Монголын улс төрд танигдсан. Эршүүд гэж хэлэгддэг. Орж ч чаддаг, гарж ч чаддаг нэгэн. Өнгөрсөн УИХ-аас өөрөө гарч, ардаа байсан Сарангэрэлийг УИХ-ын гишүүн болгож байсан жентьлемен гэж хэлдэг. Тухайн үедээ, МАХН-ын дарга Н.Энхбаяртайгаа үзэлцэж, " Энэ төрийг Та мэддэг юм уу, Таны эхнэр мэддэг юм уу? " хэмээн " үзэлцэж" эр зоригтойгоороо гайхагдаж байсан. Хожим сүүлд уучлал гуйж, аавынд оролгүй үлдэх манёвраа хийсэн тухай ойр тойрныхон ярьдаг . Хамгийн сүүлд Шийдлийн засгийн газрын Шадар сайдын албан тушаалыг хашиж байсан. Өмнө нь УИХ -ын гишүүн, Батлан Хамгаалахын сайд хийж байсан. Хөдөлмөрийн сайд Г.Баярсайханыг төрийн ордонд шанаадаж унагаснаа болж, төрийн ордноос гарсан ийм нэгэн намтартай Хэнтийн гаралтай улс төрч.
Монгол улсын шадар сайд, ЗГХЭГ-ын дарга Ж.МӨНХБАТ : Арын сайхан хангайд төрсөн, улс төрч мэргэжилтэй. Анх УИХ-ын дарга Төмөр-Очирын туслахаар ажиллаж улс төрд ойртсон. Яруу найрагч, Болор цомын эзэн,мөн кино зохиолч гэдгээр нь түүнийг бас мэднэ. Намаа хүнд үед нь хүчин зүтгэхээр сэтгэл шулуудаж, намын бага хурлын заалнаас нэр дэвшин өрсөлдөж Ж.Сүхбаатар гишүүнийг ялж, намын ерөнхий нарийн бичгийн даргаар сонгогдсон. Архангай аймагт 2 удаа нэр дэвшиж, энэ жил сонгогдсон. Эрч хүч дүүрэн , эрмэлзэл тэмүүлэл ихтэй залуу улс төрч. Асуудалд өөрийн байр сууринаас хандаж чаддаг, бие даасан үзэл бодолтойгоороо олноо танигдсан. АНУ-д сурч боловсорсон, дуучин Баясгалантай ханилан сууж байсан ийм эр хүн.
Гадаад харилцааны сайд Ц.МӨНХ-ОРГИЛ : Өндөр боловсролтой сайд нарын нэг. Өрнөдөд боловсрол эзэмшсэн цөөн хуульчдын нэг гэж түүнийг үнэлдэг. Анх улс төрд Сү.Батболд, Цогтбаатар, Ё.Отгонбаяр нарын чадалтай залуусын хамт орж ирсэн. Энхбаярын нөмөр нөлөө дор байсан гэж үздэг. УИХ-ын гишүүн, Хууль зүйн дэд, Хууль зүйн сайд зэрэг өндөр албан тушаалыг хашиж байсан. Долдугаар сарын 1-тэй түүний нэрийг холбодог. Олон улсын харилцаа, гэрээ хэлэлцээрээр мэргэшсэн хуульчийн нэг. Сүхбаатар аймгийн гаралтай.
Хууль зүйн сайд С.БЯМБАЦОГТ : Нью Прогресс группийн үүсгэн байгуулагч. УИХ-д 3 дахь удаагаа сонгогдож байна. Өнгөрсөн парламентад МАН-ын бүлгийн даргын үүрэгт ажлыг сайн гүйцэтгэсэн гэдэг. Хэл аманд орооцолддоггүй цэвэр улс төрчийн тодотголтой. Түүнийг ирээдүйтэй улс төрч гэж томьёолдог. Чинээлэг хөрөнгөтэй.
Сангийн сайд Д.ЧОЙЖИЛСҮРЭН : Олныг гайхашруулсан томилгоо бол энэ байх. Хэн ч Чойжилсүрэнг болно гэж санаагүй. Гэхдээ ах лам Нямдоржийн зүтгэл гэдэг энэ буюу. Увсын Чойжилсүрэн бол мөнгөтэй, баруун солгойгүй цацдагаараа алдартай. Мөнгө тараагаад л өмнөх сонгуулиар ялсан бол энэ удаа ч энэ хочноосоо салаагүй. Түүнийг анх Н.Энхбаяр ерөнхийлөгч татаж авч, зөвлөхөөрөө ажиллуулсан байдаг. Тэр өмнө УИХ -д сонгогдож байсан. Түүнийг УИХ-ын гэхээсээ илүү, Хурдын Чойжилсүрэн гэж мэддэг. Мөнгийг учиргүй цацдаг ийм нэгэн улс төрчид Төрийн сан хөмрөгийг атгуулна гэдэг нэг л эргэлзээтэй. Мөнгө хөрөнгөтэй.
Байгаль Орчны сайд Д.ОЮУНХОРОЛ : Намынхаа эмэгтэй гишүүдийн толгой нь гэж түүнийг хэлж болно. 4 удаа сонгогдлоо. Сүүлийн хоёр сонгуульд сонгогчдод мөнгө тараасан гэж баримттай ярьдаг. Завхандаа дэвших нэр хүндгүй болоод хотыг зорьсон гэдэг. Хамтарсан засгийн газарт 6 сар ажиллахдаа мөн л Байгаль Орчны Яамны сайдаар ажилласан. Хэрхэн халж сольж, шийдвэр гаргадаг хичээлийг тус яамны сайдаар ажилласан С.Оюун, А.Оюунгэрэл нарт заасан гэдэг. Намдаа хүчтэй байр суурьтай гэдэг. Энхбаярт шахагдаад, түүнтэй тэмцэж байж байр сууриа бэхжүүлсэн нь түүний нэгэн нэмэх оноо болдог гэж үзэх нэгэн бий. Зан чанарын хувьд тэмцэгч чанар нь , түүнийг улс төрд өдий хүртэл тогтоход нөлөөлсөн гэдэг.
Хөдөлмөр нийгмийн хамгааллын сайд Н.НОМТОЙБАЯР : МАК группийн төлөөлөгч. Өмнө нь УИХ -ын гишүүнээр сонгогдсон. Дэд сайдын албыг богино бол хугацаанд ч хашиж байсан. Төрийн албаны туршлага нимгэн. Хүнтэй ажиллах арга барил дутмаг гэж түүний тухай хэлэлцдэг. Маш чухал салбарыг ийм хүнд хариуцуулж буй нь бас л эргэлзээ төрүүлнэ. Дорнодын гаралтай. Мөнгө, хөрөнгөтэй.
Батлан Хамгаалахын сайд Б.БАТ-ЭРДЭНЭ : Яагаад болохгүй гэж. Угаасаа Алдар нийгэмлэгээс хөдөлмөрийн гараагаа эхэлсэн түүхтэй. УИХ-д суугаа гурван аваргын нэг. Төрд 4удаа сонгогдсон. Намаасаа дэвшиж, ерөнхийлөгчийн сонгуульд өрсөлдсөн цорын ганц бөх. Байгаль орчны чиглэлээр голлон ажилладаг. Хэн нэгэн түүнийг лоббидсон бол, Энхтүвшинг дэмжсэн байх гэж тааварлаж байна. Нэр хүндтэй улс төрчийн нэгэнд тооцогддог.
Барилга хот байгуулалтын сайд Г.ӨНӨБОЛОР : Энэ хүний тухай одоохондоо дуулдсан сайн , муу зүйл алга. Цэвэрхэн цаас гэж харж болно. "Сөул" группийн захирал гэж дуулдана. Бодвол мөнгөтэй л , намдаа санхүүжилт өгсөн л хүн байж таарах болов уу гэж таах үлдлээ. Улс төр дэх мөрөө хэрхэн үлдээхийг харах үлдлээ, түүнээс. Мэдэхгүй учраас гайхах ч юм алга.
Боловсрол, соёл, шинжлэх ухааны сайд Ж.БАТСУУРЬ : УИХ-д 2 -ч удаа сонгогдсон. Энгийн нэгэн гэдгээр нь олон нийт мэдэх. Хэл ам, хэрүүл уруулд орооцолдсон зүйл дуулддаггүй. Ажлын туршлага, мэдлэг чадвартай . Дорнийн говиос гаралтай монголжуу нэгэн. Зам тээврийн сайд Д.ГАНБАТ: Энэ хүнийг мэдэх хүн бас одоохондоо алга. Таахад намдаа хангалттай хандив өргөсөн байж таарна.
Уул уурхай, хүнд үйлдвэрийн сайд Ц.ДАШДОРЖ : Нам нь ялахад заавал сайдын албанд тушаалд очдог хүн. Өмнө Барилга хот байгуулалтын сайдаар ажиллаж байсан. 2-ч удаа УИХ-д сонгогдсон. Уул уурхай, тамхины зэрэг бизнес эрхэлдэг. Ажлын бол туршлагатай. Хөрөнгө,мөнгөтэй.
Хүнс, хөдөө аж ахуй, хөнгөн үйлдвэрийн сайд Ц.АНАНДБАЗАР : СОД Монгол группийн үүсгэн байгуулагч. Утга зохиол судлаач. Соёлын сайд Н.Энхбаярын туслах хийж улс төрийн хүрээнд ойртсон. Петровис компанийн дэд захирлаар ажиллаж байхдаа Шатахуун түгээх Сод Монгол компаниа байгуулсан. Хэд хэдэн компани, тэр дундаа Ялалт кино театрыг хувьчилж авсан нь дуулиан дагуулдаг. 2012 оны УИХ-ын сонгуулиас түүнийг хууль хүчний байгууллагын оролцоотойгоор зайлуулсан. Дорноговийн гарал үүсэлтэй. Түүний очиж буй салбар, түүнд огт хамааралгүй гэж хэлж болох.
Эрчим хүчний сайд Д.ЦЭНГЭЛ : Нам л ялбал бас бялуу хүртэгч нэг. Аль ч даргын үед, ялгаагүй. Дэд бүтэц, эрчим хүчний сайдаар ажиллаж байсан.М.Энхболдтой бол олон зүйлээр холбогддог. Хурдан морь бол нэг л сэжим нь. Бэл чинээ ихтэй. Туршлага ч нимгэдэхгүй нэгэн. Булганых.
Эрүүл мэндийн сайд Ж.ЦОЛМОН : Сайд болох гэж буй хоёр дахь эмэгтэй. Хөвсгөл нутагт хамааралтай. Баяртай холбогддог. Хамтарсан засгийн газрын үед Ламбаа сайдтай гар нийлэн ажиллаж байсан туршлагатай. Дэд сайдаа өгснөөс хойш гадаадад сууж байгаад сонгуулийн өмнө ирсэн. Нам ялбал сайд болно гэдэг тохироо хийсэн гэж ойр тойрныхон нь ярьдаг. Хувь хүний хувьд мятаршгүй, дайчин.
Ц.ЭНХБАТ