МАН-ын лидер, УИХ-д 5 дараалан сонгогдсон, тус намын удирдах зөвлөлийн гишүүн намыхаа ирээдүйг ингэж тодорхойллоо. Тэр 65-ийн бүлэг, засгийн газар хоёр хэл амаа ололцохгүй бол бие биенээ хэмлэсээр байгаад, АН-ын өнгөрсөн түүхийг давтана гэж бүлгийн гишүүддээ санууллаа. Ц.Нямдорж тэргүүтэй 65-ийн бүлгийн гишүүд Ж.Эрдэнэбатын оруулж ирсэн татвар нэмэх, төрийн албан хаагчдын цалинг хасах төслийг буруу шийдвэр гэж үзлээ. Үүнийгээ бүлгээр хэлэлцэж байгаа нь алдаа гэж тэр хэлэв. Хоёрхон тэрбум төгрөг хэмнэхийн төлөө 400,000 сонгогчоо алдаж болохгүйг тэр хатуу сануулав. Бусдын үгийг сонс, тайлбар тавихаас өмнө алдаагаа зас гэсэн үгийг ерөнхий сайд Ж.Эрдэнэбат, Сангийн сайд Чойжилсүрэн нарт хаяглалаа.
Ерөнхий сайд, сангийн сайд нар эхнийхээ цохилтыг бүлгээсээ ийнхүү амслаа. Төсөв мөнгөтэй холбоотой асуудлыг нягталж, хүний өөрийн гэлгүй хариуцлага тооцох санааг ч Ц.Нямдорж гишүүн хэлсэн үгэндээ цухалзуулав. Энэ бол тэр их орж ирсэн мөнгөний сургыг гарга, хаашаа орчихов гэдгийг олж тогтоо гэж хэлсэнтэй агаар нэг сонсогдов. Тэгэхээр өнгөрсөн 4 жил ч биш, түүний өмнөх МАН-ын засаг барьсан 4 жилийн санхүүгийн үйл ажиллагааг нягтал гэж тэр хэллээ гэж ойлгогдлоо. Зовох дөрвөн жил ирснийг тэр дахин онцоллоо. Хэрвээ хэл амаа ололцохгүй энэ дөрвөн жил бие биенээ хэмлэх аваас Ардчилсан Намынхантай адил дараагийн дөрвөн жилд толгойгоо унжуулан гудамж метрлэх болно шүү гэж сургамж хайрлалаа.
1996 онд Ардчилсан Холбоо эвсэл 50 суудал авч, ерөнхий сайдаар М.Энхсайханыг томилсны дараа мөн л ийм асуудал үүсч байсан. М.Энхсайхан эдийн засаг хүнд байна гээд толгой мэдэн эрчим хүчний үнийг чөлөөлсөн. Энэ эдийн засгийн шийдвэр нь, эргээд түүнд улс төрийн шийтгэл болон ирсэн түүхтэй. 1996 оны намар Ардчилсан Холбоо эвсэл орон нутгийн сонгуулийг тэр чигт нь МАХН-д алдсан. Тиймээс М.Энхсайхантай улс төрийн хариуцлага тооцож, ерөнхий сайдаас нь огцруулсан түүх бий. Эдийн засгийн хүч түрсэн шийдвэр нь өөрт нь эргээд өндөр үнэтэй тусдаг гэдгийг энэ бяцхан түүх сануулж байгаа болов уу. Энэ намар ч гэсэн орон нутгийн сонгууль болно. Энэ сонгууль бол 2017 оны ерөнхийлөгчийн сонгуульд хэн ялах вэ? гэдгийн өнгийг тодорхойлох болно. МАН ялалтандаа эргэлзэж эхэлжээ. Тэдний баяр баясгалан төгсөж, зовлон эхэлсэн байна.
Ц.ХИШГЭЭ