Монголын бүх нам хувьд шилжсэн. Зүй ёсоороо хөгжиж буй хоёрхон нам бий. Нэг нь одоогийн эрх баригч МАН. Нөгөө нь эрх баригчаас сөрөг хүчний байранд шилжсэн АН. Монголын улс төрийн хөгжил энэ хоёр намаас, энэ хоёр намын хөгжлөөс, хэн энэ намыг удирдах вэ? Гэдгээс шууд хамааралтай. Энэ хоёр намын даргыг УИХ-ын гишүүн, засгийн газрын гишүүнтэй нэг эгнээнд зүйрлэж тавьж болохгүй.
Тиймээс Ардчилсан Намын дарга хэн болох вэ? гэдэг асуудал ерөнхийлөгчийн сонгуулиас ч үнэтэй байж болох магадлалтай. Яагаад гэвэл, ирэх 2017 онд ерөнхийлөгч хэн байх вэ? гэдгийг энэ хоёр нам л эцэслэн шийдвэрлэнэ. Тиймээс Ардчилсан Намын дарга хэн байх вэ? гэдэг олны анхаарлын төвд байна. Энэ намрын орон нутгийн сонгуульд, ирэх 2017 оны ерөнхийлөгчид ялалт байгуулахад АН-ыг удирдах хүн хэн бэ?
Ц.Элбэгдоржийн шууд мэдлийн хүн гэх П.Цагаан уу? Аль эсвэл, намаа 2012 оны сонгуульд ялалтад хүргэхэд үнэтэй хувь нэмэр оруулсан Д.Эрдэнэбат уу? Эс бөгөөс Лу.Болд, Я.Санжмятав нарын нэг үү? гэдгийг энэ долоо хоногийн сүүлээр мэдэх болно.
Одоогоор АН-ын ҮЗХ-ны хурлын тов гарсан, АН-ын одоогийн дарга З.Энхболд хариуцлагаа хүлээж, тамга тэмдгээ хүлээлгэн өгөхөөр зэхэж буй. Харин түүний залгамжлагч нь чухам хэн бэ? Нэр хүнд нь унасан, ардчиллын үнэрээс холдсон Ардчилсан Намын үр хөврөл үү? Эс бөгөөс анх 90 онд байгуулж байсан Монголын төлөө гэх сэтгэлийг агуулсан АН-ын төлөөлөгч үү? гэдгийг гишүүд нь шийднэ. Гишүүд эхлээд даргаа сонгоё , дараа нь намаа шинэчлэе гэсэн байр суурьтай байна гэж эх сурвалжууд мэдээлж байна. Намуудын фракцуудын хооронд идэвхтэй хэлэлцээр явагдаж эхэлжээ. Тохироо нь бүрдвэл, энэ баасан гарагт ҮЗХ-ны хурлаа хийж, туг барьж явах даргаа сонгоно. АН-ын намын дарга зөв хүн байх нь тус намын төдийгүй, нийгмийн захиалга гэж олон нийт үзэж байна.
Ц.ЭНХБАТ