Баянгол дүүргээс бизнесийн гараагаа эхэлсэн, тус дүүргээс төр түмнээ төлөөлж УИХ-д сонгогдож байсан С.Одонтуяа Баянгол дүүргийг хөгжүүлэх хөтөлбөрөө хэрэгжүүлэхээр тамга тэмдгээ гардан авлаа.
Нийслэлийн 9 дүүрэгт АН-аас итгэлтэй ялалт байгуулсан цорын ганц дүүрэг бол Баянгол дүүрэг.
АН-ын нэр хүнд бүхэлдээ унасан, 21 аймаг, хотод тэрчигтээ МАН ялахад, ганцаараа торойж, АН-ынхаа тугийг мандуулсан дүүрэг бол Баянгол гэдгээрээ сонгуулийн түүхэнд ч, АН-ын түүхэнд ч тодоор бичигдэж үлдэнэ. Ардчилсан Намын тэрхүү цорын ганц засаг дарга нь С.Одонтуяа. С.Эрдэнэ+ С.Одонтуяагийн хослол гайхалтай ажилласан. Тэд анхнаасаа л, АН ялсан тохиолдолд С.Одонтуяа дүүргийн даргаар ажиллана гэж ил тод зарласан. Баг нь ч сайн ажилласан. Иргэд ч дэмжсэн. Одоо харин дүүргийг хэрхэн яаж хөгжүүлж болдгийг харуулах цаг үлдлээ. Одонтуяа тамгаа авахдаа, төр бол иргэддээ ээлтэй байх ёстой, тиймээс иргэддээ ээлтэй Засаг дарга байна гэж өөрийнхөө байр суурийг тодотголоо. Ядуурлыг бууруулах, ажлын байрыг нэмэгдүүлэх, өрхийн орлогыг нэмэгдүүлэх, иргэдийн идэвх санаачилгыг дэмжих гээд сонгуулийн мөрийн хөтөлбөрт тусгасан олон амлалтаа хэрэгжүүлэхийн төлөө ханцуй шамлан орох цаг иржээ. С.Одонтуяагийн хувьд, бизнес эрхлэгчээс хууль тогтоогч, хууль тогтоогчоос гүйцэтгэх засаглалд шилжиж буй эрч хүчтэй, мэдлэг боловсролтой, ир бяр нь ханасан төрийн түшээ , чадварлаг удирдагч гэж намынх нь нөхөд үнэлдэг. Түүнээс, Баянгол дүүргийг минь Сингапур шиг хөгжүүлж өгөөч, бид оролцоё гэдэг хүсэлтийг иргэдээс уламжилж буй. Энэхүү зорилгыг биелүүлэх багаа хэрхэн сонгох вэ? гэдгээс ажлаа эхэлнэ гэж Баянгол дүүргийн засаг дарга С.Одонтуяа CONTROL.MN-ийн сурвалжлагчид дурдлаа.
О.НАНСАЛМАА