Монгол улсын ерөнхийлөгч Ц.Элбэгдоржийн хойд, урд хөршийн удирдлагатай хийгээд байсан гурван удирдагчийн удаа дараагийн "сүрхий" уулзалт ямар ч үр дүнгүй хоцров уу? Түүний мэдэлд байдаг, дипломат алба, гадаад бодлого, улс төр, эдийн засгийн хамтын ажиллагаа шалдаа ортол унасны илрэл, энэ мөн үү? Энэ зөвхөн түүний өөрийнх нь имиж өсгөх төдий "хөөс" байсан юм гэж үү? Нөгөө яриад байсан, итгэл төрүүлээд байсан, эдийн засгийн коридорын гадна талд Монгол улс ийн үлдэж хоцрох нь, энэ үү.
Шил дараалсан ийм асуулт, Хятадын төрийн зөвлөлийн ерөнхий сайдын ОХУ-д хийсэн айлчлалын үр дүнг сонсоод төрлөө. Оросын ерөнхий сайд Медведев, Хятадын Төрийн зөвлөлийн ерөнхий сайд Ли Кэцян нар Москва-Бээжинг холбосон хурдны галт тэрэг барих гэрээнд гарын үсэг зурчихлаа.
Энэ хурдны замын зураг нь Монголыг тойрсон болохыг та бүхэн харж болно. Мөн, монголчуудыг хүлээлгээд, догдлуулаад байсан, хийн хоолой ч гэсэн Монголыг тойрсон. Монголчууд, Хятад гүрний дэвшүүлсэн "WIN WIN" буюу "Та ч хож, би ч хожьё" буюу "ХОЁУЛАА ХОЖЬЁ" бодлогын гадна талд "шидэгджээ".
Хятадын засгийн газар Монголтой ажиллах бодлогоо хэрхэн тодорхойлж байна вэ, тэгвэл. Яг одоогоор, Монголтой, эрчим хүчний асуудлаар хамтран ажиллах чиглэл гаргасан. Энэ бол Монголын нүүрсийг түшиглэж барих Цахилгаан станцын тухай л асуудал юм. Харин тээвэр, транзит тээврээс орлого олдог байсан тухайгаа мартах цаг ойртжээ, монголчууд.
Хятад, Орос хоёр хурдны төмөр зам барьчихвал, Монголын төмөр зам намагт шигдэнэ гэсэн үг. Биднийг өөр хоорондоо хэмлэлдсээр суух зуур, улс орнуудын хөгжил талийх нь ээ. "Хөөс" буухад, хоосон хоцрох нь дээ.
Нийтлэлч Ц.ЭНХБАТ